ఎంపీపీ అభ్యర్థిగా జయవరపు శ్రీరామమూర్తి జెడ్పీటీసీ అభ్యర్థిగా కూరపాటి సుజాత, 16 ఎంపీటీసీ స్థానాల్లో జనసేనకు 6, టీడీపీకి 10 స్థానాలు కేటాయింపు
బుట్టాయిగూడెం: సూర్య న్యూస్:. నర్సాపురం మండల స్థానిక సంస్థల ఎన్నికల్లో కూటమి అభ్యర్థుల విజయానికి ప్రతి ఒక్కరూ సమష్టిగా కృషి చేయాలని పోలవరం ఎమ్మెల్యే చిర్రి బాలరాజు పిలుపునిచ్చారు.సోమవారం బుట్టాయిగూడెంలో నాయకులు గద్దే అబ్బులు నివాసంలో నిర్వహించిన కూటమి పార్టీల సమావేశంలో టి. నర్సాపురం మండలానికి సంబంధించిన అభ్యర్థులను ఖరారు చేశారు. ఈ సందర్భంగా జెడ్పీటీసీ అభ్యర్థిగా కూరపాటి సుజాతను, ఎంపీపీ అభ్యర్థిగా జయవరపు శ్రీరామమూర్తిని ప్రకటించారు.మండలంలోని మొత్తం 16 ఎంపీటీసీ స్థానాల్లో జనసేన పార్టీకి 6 స్థానాలు, తెలుగుదేశం పార్టీకి 10 స్థానాలు కేటాయించినట్లు ఎమ్మెల్యే చిర్రి బాలరాజు, ట్రైకార్ చైర్మన్ బోరగం శ్రీనివాస్‌తో పాటు కూటమి ముఖ్య నాయకులు వెల్లడించారు.ఈ సందర్భంగా ఎమ్మెల్యే చిర్రి బాలరాజు మాట్లాడుతూ.. స్థానిక సంస్థల ఎన్నికల్లో కూటమి అభ్యర్థుల విజయమే లక్ష్యంగా నాయకులు, కార్యకర్తలు సమన్వయంతో పనిచేయాలని సూచించారు. కూటమి పార్టీల మధ్య ఐక్యతను కాపాడుకుంటూ ప్రజల మద్దతుతో అన్ని స్థానాల్లో విజయానికి కృషి చేయాలని కోరారు.ఈ కార్యక్రమంలో ఎన్నికల పరిశీలకులు కోళ్ల నాగేశ్వరరావు, ఏఎంసీ చైర్మన్ పొట్టా రామారావు, శీలం వెంకటేశ్వరరావు, వైస్ చైర్మన్ కొండేపాటి రామకృష్ణ, మొగపర్తి సోంబాబు, పిన్నమనేని మధు, నాయుడు రామకృష్ణ గౌడ్ తదితర కూటమి నాయకులు పాల్గొన్నారు.
పసుమర్తి రాము జల ఇంచార్జ్ ఏలూరు,
