తొండుపల్లి జాతీయ రహదారి 44పై ప్రజల ప్రాణాలతో చెలగాటమా?
బస్టాప్‌లు, ఫుట్‌పాత్‌లు లేక ప్రయాణికుల అవస్థలు.. తక్షణమే భద్రతా చర్యలు చేపట్టాలని స్థానికుల డిమాండ్
శంషాబాద్: తొండుపల్లి జాతీయ రహదారి 44పై పాదచారులు, ప్రయాణికుల భద్రతను అధికారులు పట్టించుకోవడం లేదని స్థానిక ప్రజలు తీవ్ర ఆవేదన వ్యక్తం చేస్తున్నారు. బస్సుల కోసం వేచి ఉండేందుకు బస్టాప్‌లు లేకపోవడం, పాదచారులు సురక్షితంగా నడిచేందుకు ఫుట్‌పాత్‌లు లేకపోవడం, దెబ్బతిన్న డివైడర్లు ప్రమాదకరంగా మారడం అధికారుల నిర్లక్ష్యానికి నిదర్శనమని వారు విమర్శిస్తున్నారు.
ఈ మార్గంలో ప్రతిరోజూ వందలాది మంది ప్రజలు, విద్యార్థులు, మహిళలు, వృద్ధులు రాకపోకలు సాగిస్తుంటారు. అయితే, భారీ వాహనాల రద్దీ మధ్య రోడ్డు దాటాల్సి రావడంతో పాదచారులు తీవ్ర ఇబ్బందులు ఎదుర్కొంటున్నారు. కనీస సౌకర్యాలు లేకపోవడంతో ఎప్పుడు ఏ ప్రమాదం జరుగుతుందోనని ప్రజలు ఆందోళన చెందుతున్నారు.
ప్రమాదాలు జరిగిన తర్వాత స్పందించడం కంటే ముందుగానే నివారణ చర్యలు చేపట్టడం అవసరమని స్థానికులు అభిప్రాయపడుతున్నారు. సంబంధిత అధికారులు ఇప్పటికైనా స్పందించి, తొండుపల్లి జాతీయ రహదారిపై ప్రయాణికుల సౌకర్యార్థం బస్టాప్‌లు ఏర్పాటు చేయాలని, పాదచారుల కోసం ఫుట్‌పాత్‌లు నిర్మించాలని కోరుతున్నారు. అలాగే, రోడ్డు దాటే ప్రాంతాల్లో జీబ్రా క్రాసింగ్‌లు ఏర్పాటు చేయడంతో పాటు దెబ్బతిన్న డివైడర్లకు తక్షణమే మరమ్మతులు చేపట్టాలని డిమాండ్ చేస్తున్నారు.
ప్రజల ప్రాణ భద్రత విషయంలో నిర్లక్ష్యం తగదని, సంబంధిత అధికారులు క్షేత్రస్థాయిలో పర్యటించి సమస్యలను పరిశీలించాలని స్థానికులు కోరుతున్నారు. తొండుపల్లి జాతీయ రహదారిపై ప్రమాదాలు జరగకముందే అధికారులు మేల్కొని తక్షణ భద్రతా చర్యలు చేపట్టాలని ప్రజలు డిమాండ్ చేస్తున్నారు.
