మోహన్‌లాల్ 'అతిమనోహరం' ఫస్ట్ సింగిల్ విడుదల.. ఎంజీ శ్రీకుమార్ కాంబో మళ్లీ రిపీట్
సూర్య ఎంటర్‌టైన్‌మెంట్ డెస్క్:మలయాళ వర్సటైల్ స్టార్ హీరో మోహన్‌లాల్, ప్రతిభావంతుడైన దర్శకుడు తరుణ్ మూర్తి కాంబినేషన్‌లో తెరకెక్కుతున్న మోస్ట్ అవేటెడ్ మూవీ అతిమనోహరం సినిమా నుంచి బిగ్ అప్‌డేట్ వచ్చేసింది. ప్రేక్షకులలో ఎంతో ఆసక్తిని రేకెత్తిస్తున్న ఈ చిత్రం నుంచి మొదటి లిరికల్ పాట సుందర రావుణన్ ను చిత్ర బృందం విడుదల చేసింది. ప్రముఖ సంగీత దర్శకుడు జేక్స్ బిజోయ్ స్వరాన్ని అందించిన ఈ పాటకు బి కే హరినారాయణన్ సాహిత్య బాధ్యతలు వహించగా, మోహన్‌లాల్ హిట్‌ కాంబినేషన్ సింగర్ ఎంజీ శ్రీకుమార్ ఆలపించారు. ఈ పాట విడుదలైన కొద్ది సమయాలోనే నెట్టింట వైరల్‌గా మారి మంచి స్పందనను దక్కించుకుంటోంది.
ఈ చిత్రంలో మోహన్‌లాల్ ఒక సాధారణ పోలీస్ సబ్ ఇన్‌స్పెక్టర్ టిఎస్ లవ్‌లజన్ పాత్రలో కనిపిస్తున్నారు. ఆయన వృత్తిపరమైన బాధ్యతలతో పాటు వ్యక్తిగత జీవితంలో చోటుచేసుకునే రసవత్తర మరియు వినోదాత్మక సన్నివేశాల నేపథ్యంలో సినిమా కథనం సాగనున్నట్లు తెలుస్తోంది. తాజాగా విడుదలైన సుందర రావుణన్ పాటలో మోహన్‌లాల్ మార్క్ కామెడీ, పోలీసు యూనిఫామ్‌లోని సరదా సన్నివేశాలు ప్రేక్షకులను విపరీతంగా ఆకట్టుకుంటున్నాయి. అంతేకాకుండా సుదీర్ఘ విరామం తర్వాత మోహన్‌లాల్ సరసన కథానాయికగా నటిస్తున్న మీరా జాస్మిన్‌తో ఉన్న క్యూట్ సన్నివేశాలు కూడా ఈ పాటకు ప్రధాన ఆకర్షణగా నిలిచాయి.
ఆషిక్ ఉస్మాన్ ప్రొడక్షన్స్ పతాకంపై ఆషిక్ ఉస్మాన్ నిర్మిస్తున్న ఈ భారీ బడ్జెట్ చిత్రానికి ఇష్క్, ఆలప్పుళ జిమ్‌ఖానా చిత్రాల రచయిత రతీష్ రవి కథ, స్క్రీన్‌ప్లే అందించారు. లాలూ అలెక్స్, మనోజ్ కే జయన్, జగదీష్ తదితర ప్రముఖ నటులు కీలక పాత్రలు పోషిస్తున్న ఈ సినిమా చిత్రీకరణ తొడుపుళ, కొచ్చి, శబరిమల, హైదరాబాద్, ముంబై వంటి విభిన్న ప్రదేశాల్లో జరిగింది. షాజీ కుమార్ ఛాయాగ్రహణం అందించిన ఈ చిత్రానికి వివేక్ హర్షన్ ఎడిటింగ్ బాధ్యతలు నిర్వహించారు.
సంగీత ప్రియులను అలరిస్తున్న ఈ మొదటి సింగిల్‌తో సినిమాపై అంచనాలు మరింతగా పెరిగాయి. ఈ చిత్రాన్ని డిసెంబర్ 24న క్రిస్మస్ కానుకగా ప్రపంచవ్యాప్తంగా గ్రాండ్‌గా థియేటర్లలో విడుదల చేసేందుకు నిర్మాతలు సన్నాహాలు చేస్తున్నారు. క్లాస్ మరియు మాస్ ప్రేక్షకులను ఆకట్టుకునే అంశాలతో రూపుదిద్దుకున్న ఈ సినిమా, బాక్సాఫీస్ వద్ద విజయం సాధించడం ఖాయమని అభిమానులు ధీమా వ్యక్తం చేస్తున్నారు. మోహన్‌లాల్ నటనతో పాటు ఎంజీ శ్రీకుమార్ ఆలపించిన ఈ మాస్ మెలోడీ సాంగ్ ప్రస్తుతం డిజిటల్ ప్లాట్‌ఫామ్‌లలో శ్రోతలను విపరీతంగా అలరిస్తోంది.
