తెలంగాణ గ్రామీణ బ్యాంకు సేవలను సద్వినియోగం చేసుకోవాలి – మేనేజర్ వరుణ్

సూర్య, తంగళ్ళపల్లి: తెలంగాణ గ్రామీణ బ్యాంకు అందిస్తున్న సేవలను ప్రతి ఒక్కరూ సద్వినియోగం చేసుకోవాలని తంగళ్లపల్లి తెలంగాణ గ్రామీణ బ్యాంక్ మేనేజర్ వరుణ్ కుమార్ అన్నారు. తంగళ్లపల్లి మండల కేంద్రంలో తెలంగాణ గ్రామీణ బ్యాంకు ఆధ్వర్యంలో శుక్రవారం బ్యాంకు సేవలపై అవగాహన సదస్సు నిర్వహించారు. ఈ సందర్భంగా మేనేజర్ మాట్లాడుతూ.. రైతులకు వ్యవసాయ రుణాలు, ఎల్.టి రుణాలు, పాడి గేదెల కొనుగోలు కోసం రుణాలు అందిస్తున్నామన్నారు. మహిళా సంఘాలకు తక్కువ వడ్డీపై 25 లక్షల వరకు రుణాలు, అలాగే ట్రాక్టర్, హార్వెస్టర్, జేసీబీ వంటి వాటిపై రుణాలు ఇస్తున్నామన్నారు. రైతునేస్తం, వివిధ రకాల ప్రధాన మంత్రి ఇన్సూరెన్స్ పథకాల గురించి అవగాహన కల్పించారు.
రైతులు తీసుకున్న రుణాలను సకాలంలో చెల్లించి బ్యాంకు అభివృద్ధికి సహకరించాలని కోరారు. ఫిక్స్డ్ డిపాజిట్ల మీద కూడా అత్యధిక వడ్డీ రేట్లు తమ బ్యాంకు ఇస్తుందని తెలిపారు.
ఈ కార్యక్రమంలో  బ్యాంకు సిబ్బంది తిరుపల్ రెడ్డి,  కాంగ్రెస్ నాయకుడు బొడ్డు పర్ష రాములు, సీఎస్పీలు, ఐకేపీ సిబ్బంది, వినియోగదారులు, రైతులు పాల్గొన్నారు.