సీఐఐ సదస్సు ప్రాంగణంలో ఎంఎస్ఎంఈ ఎగ్జిబిషన్ ను వీక్షించిన మంత్రి లోకేష్

విశాఖపట్నం, మేజర్‌న్యూస్‌ :

 రాష్ట్రంలో పెద్ద పరిశ్రమల స్థాపనతో పాటు ఎంఎస్ఎంఈలను ప్రోత్సహించాల్సిన అవసరం ఉందని, ఆ దిశగా ప్రజాప్రభుత్వం చర్యలు చేపడుతుందని విద్య, ఐటీ శాఖల మంత్రి నారా లోకేష్ పేర్కొన్నారు. సీఐఐ భాగస్వామ్య సదస్సులో భాగంగా రెండో రోజు సదస్సు ప్రాంగణంలో ఏర్పాటుచేసిన ఎంఎస్ఎంఈ ఎగ్జిబిషన్ ను మంత్రి వీక్షించారు. ఆయా పరిశ్రమల ఉత్పత్తులు, పరికరాలు, నూతన ఆవిష్కరణలను మంత్రి ఆసక్తిగా పరిశీలించారు. ప్రెసిషన్ ఇంజనీరింగ్ అండ్ ఎలక్ట్రికల్, ఏరోస్పేస్ అండ్ డిఫెన్స్, మెటీరియల్ అండ్ మొబిలిటీ సొల్యూషన్స్, ఆర్టీఐహెచ్ ఇన్నోవేటర్స్ ఏరీనా, అగ్రి-టెక్ అండ్ సర్క్యులర్ ఎకానమీ, ఎస్ హెచ్ జీ అండ్ ఉమెన్-లెడ్ ఎంటర్ ప్రైజ్డ్, ఫార్మా అండ్ మెడ్ టెక్, ఫుడ్ ప్రాసెసింగ్ స్టాళ్లను సందర్శించి నిర్వాహకులను వివరాలు అడిగి తెలుసుకున్నారు. సిర్మిక్ ఇన్సులేటర్స్, స్టేషన్ హైడ్రాలిక్ పవర్ ప్యాక్, ఎడ్యుకేషనల్ రోబోట్, కండక్టివ్ గ్యాస్ కెట్స్ , వేవ్ గైడ్స్, క్వాంటం కంప్యూటింగ్ కాంపోనెంట్స్, మిసైల్ ఎజెక్షన్ మెకానిజం, ప్యాకింగ్ ఐటెమ్స్, ఏసీపీ షీట్స్, లిథియం బ్యాటరీస్, లీబాంగ్ వాటర్ ఫ్రూఫింగ్ ఉత్పత్తులు, వాయిస్ కమాండ్ ద్వారా పనిచేసే ఏఐ డ్రోన్, హెల్మెట్ శానిటైజింగ్ మెషిన్ వంటి పలు నూతన ఆవిష్కరణలను మంత్రి ఆసక్తిగా పరిశీలించారు. ఆయా ఆవిష్కరణలు, ఉత్పత్తులకు సంబంధించిన వివరాలు అడిగి తెలుసుకున్నారు.

ఎకోసిస్టమ్ ను అభివృద్ధి చేస్తాం

అనంతరం ఔత్సాహిక ఎంఎస్ఎంఈ పారిశ్రామికవేత్తలతో సమావేశమయ్యారు. వారి ఆవిష్కరణలు, ఆదాయం, కల్పించిన ఉద్యోగాల గురించి వివరాలు అడిగి తెలుసుకున్నారు. ఈ సందర్భంగా మంత్రి మాట్లాడుతూ.. రాష్ట్రంలో ఎంఎస్ఎంఈలను పెద్దఎత్తున ప్రోత్సహిస్తామన్నారు. మీరంతా సొంతకాళ్లపై నిలబడ్డారని, ఇది ఎంతో గర్వకారణమని ప్రశంసించారు. మీరంతా ఎకో సిస్టమ్ క్రియేటర్స్. అభివృద్ధి చెందిన దేశాలను గమనిస్తే.. ఎకో సిస్టమ్ కీలకపాత్ర పోషిస్తోంది. రాష్ట్రంలో కూడా ఎకోసిస్టమ్ అభివృద్ధికి కృషిచేస్తున్నామని ఈ సందర్భంగా మంత్రి లోకేష్ చెప్పారు.

ఈ కార్యక్రమంలో కేంద్రమంత్రి కే.రామ్మోహన్ నాయుడు, ఎంఎస్ఎంఈ, సెర్ప్ శాఖల మంత్రి కొండపల్లి శ్రీనివాస్ పాల్గొన్నారు.