సంసిద్ క్యాంఫర్డ్ ఒలింపియాడ్ క్యాంపస్‌లో బాలల దినోత్సవ సంబురాలు – ఫ్యాన్సీ డ్రెస్ పోటీలతో చిన్నారుల సందడి.”
చిత్తూరు అర్బన్, మేజర్ న్యూస్:
చిన్నారుల్లో దాగి ఉన్న సృజనాత్మక ప్రతిభను వెలికితీయడంతో పాటు, వారిలో ఆత్మవిశ్వాసం, అభివ్యక్తి నైపుణ్యాలను పెంపొందించడమే లక్ష్యంగా సంసిద్ క్యాంఫర్డ్ ఈస్ట్–ఒలింపియాడ్ క్యాంపస్‌లో శుక్రవారం బాలల దినోత్సవ వేడుకలను ఘనంగా నిర్వహించారు. చిన్నారుల ఆటపాటలు, ఉత్సాహభరిత ప్రదర్శనలతో పాఠశాల ప్రాంగణం సందడిగా మారింది. ఈ సందర్భంగా నిర్వహించిన ఫ్యాన్సీ డ్రెస్ పోటీలు ప్రత్యేక ఆకర్షణగా నిలిచాయి.
వివిధ రకాల వేషధారణలతో చిన్నారులు వేదికపైకి వచ్చి తమ అభినయం, మాటతీరు, హావభావాలతో ఆహూతులను విశేషంగా ఆకట్టుకున్నారు. చిన్న వయసులోనే ఎంతో ధైర్యంగా వేదికపై తమ ప్రతిభను ప్రదర్శించిన విద్యార్థులను చూసి తల్లిదండ్రులు, ఉపాధ్యాయులు ఆనందం వ్యక్తం చేశారు. ప్రతి చిన్నారిలోనూ ఏదో ఒక ప్రత్యేకమైన నైపుణ్యం దాగి ఉంటుందని, పాఠశాల స్థాయిలో నిర్వహించే ఇలాంటి కార్యక్రమాలు ఆ ప్రతిభను వెలికితీసేందుకు ఎంతగానో దోహదపడతాయని పలువురు పేర్కొన్నారు.
ఈ వేడుకలకు ముఖ్య అతిథులుగా అక్షరాభ్యాస్ మాంటిస్సోరి ప్రీ స్కూల్ కరస్పాండెంట్ ఆదిలక్ష్మి, టీమ్ కిడ్జ్ ఇంటర్నేషనల్ ప్రీ స్కూల్ కరస్పాండెంట్ యువశ్రీ, జి.ఐ.సి.టి. కంప్యూటర్స్ యజమానురాలు సుధా హాజరయ్యారు. చిన్నారుల ప్రదర్శనలను ఆసక్తిగా తిలకించిన వారు, విద్యార్థుల ప్రతిభను ప్రత్యేకంగా అభినందించారు. బాలల దినోత్సవం అనేది పిల్లల ఆనందానికి మాత్రమే పరిమితం కాకుండా, వారి ఆశయాలు, ఆకాంక్షలు, భవిష్యత్తు లక్ష్యాలకు ప్రోత్సాహం అందించే గొప్ప సందర్భమని తెలిపారు.
ఈ సందర్భంగా పాఠశాల ప్రిన్సిపాల్ చిత్ర మాట్లాడుతూ, విద్యార్థులకు పాఠ్యాంశాలతో పాటు సృజనాత్మకత, ఆత్మవిశ్వాసం, నాయకత్వ లక్షణాలను పెంపొందించేందుకు పాఠశాలలో ప్రత్యేక కార్యక్రమాలు నిర్వహిస్తున్నట్లు తెలిపారు. ఫ్యాన్సీ డ్రెస్ పోటీల వంటి వేదికల ద్వారా చిన్నారులు ధైర్యంగా మాట్లాడటం, తమ ఆలోచనలను ఇతరులతో పంచుకోవడం, భావాలను స్వేచ్ఛగా వ్యక్తపరచడం నేర్చుకుంటారని వివరించారు. ప్రతి విద్యార్థిలోనూ దాగి ఉన్న ప్రతిభను గుర్తించి, వారికి తగిన ప్రోత్సాహం అందించడం ఉపాధ్యాయుల బాధ్యతని పేర్కొన్నారు.
వేడుకలను విజయవంతం చేసిన ముఖ్య అతిథులు, తల్లిదండ్రులు, ఉపాధ్యాయులకు ప్రిన్సిపాల్ చిత్ర కృతజ్ఞతలు తెలిపారు. ఈ కార్యక్రమంలో సమన్వయకర్తలు తిలకవతి, గీత, సెల్వి, రఘు తదితరులు పాల్గొన్నారు.
చిత్తూరు అర్బన్ రిపోర్టర్, లవకుమార్
