లక్ష డిజిటల్ ఎంఎస్ఎంఈల తయారీకి 50 కేంద్రాలు: మంత్రి కొండపల్లి శ్రీనివాస్

విశాఖపట్నం, మేజర్‌న్యూస్‌ : 
కృత్రిమ మేధ (ఏఐ), ఆటోమేషన్ వంటి ఆధునిక సాంకేతికతలు ప్రపంచ ఉద్యోగ మార్కెట్లను సమూలంగా మారుస్తున్నాయని, భవిష్యత్ ఆర్థిక వ్యవస్థలో రాణించాలంటే యువత నిరంతర అభ్యాసం, సరికొత్త నైపుణ్యాలను అందిపుచ్చుకోవాలని పలువురు వక్తలు పిలుపునిచ్చారు. విశాఖపట్నంలో జరుగుతున్న సీఐఐ భాగస్వామ్య సదస్సు రెండో రోజు శుక్రవారం హాల్-2లో ‘భవిష్యత్ ఆర్థిక వ్యవస్థకు నైపుణ్యాలు – ప్రతిభ, ఏఐ, డిజైన్, డిజిటల్ అభ్యాసం’ అనే అంశంపై ప్లీనరీ సమావేశం నిర్వహించారు.

*మహిళా పారిశ్రామికవేత్తలకు ‘స్వయం ఏపీ’ బ్రాండ్: మంత్రి కొండపల్లి శ్రీనివాస్*
రాష్ట్ర సూక్ష్మ, చిన్న, మధ్యతరహా పరిశ్రమలు (ఎంఎస్ఎంఈ), గ్రామీణ పేదరిక నిర్మూలన సంస్థ (సెర్ప్) శాఖ మంత్రి కొండపల్లి శ్రీనివాస్ మాట్లాడుతూ.. ఆస్తిని వారసత్వంగా పొందవచ్చేమో కానీ, నైపుణ్యాన్ని ఎవరూ దోచుకోలేరని, అది అత్యంత ప్రజాస్వామ్యబద్ధమైన సంపద అని అభివర్ణించారు. రాష్ట్రంలోని 25 లక్షల ఎంఎస్ఎంఈలలో 11 లక్షల సంస్థలు మహిళలవేనని పేర్కొన్నారు. సీఐఐ సహకారంతో లక్ష డిజిటల్ ఎంఎస్ఎంఈలను తీర్చిదిద్దేందుకు 50 డిజిటల్ ట్రాన్స్‌ఫర్మేషన్ కేంద్రాలను ఏర్పాటు చేస్తున్నట్లు వెల్లడించారు. స్వయం సహాయక సంఘాల (ఎస్‌హెచ్‌జీ) మహిళలు తయారు చేసే ఉత్పత్తులకు అంతర్జాతీయ మార్కెట్ కల్పించేందుకు ‘స్వయం ఏపీ’ పేరుతో ప్రత్యేక బ్రాండ్‌ను తీసుకొస్తున్నామని తెలిపారు. ‘వసుధ’ ప్రాజెక్టు కింద ఉచితంగా జర్మన్ భాష నేర్చుకున్న 44 మంది నర్సులు ప్రస్తుతం జర్మనీలో ఉద్యోగాలు చేస్తున్నారని, తీరప్రాంత మహిళలకు సముద్ర నాచు (సీవీడ్) సాగులో, మిల్లెట్ వంటకాల్లో శిక్షణ ఇచ్చి ఉపాధి కల్పిస్తున్నామని వివరించారు.

*ఆన్‌లైన్ విద్యకు ప్రత్యక్ష శిక్షణ తోడవ్వాలి: కార్యదర్శి భాస్కర్ కాటమనేని*
రాష్ట్ర ఐటీ, ఎలక్ట్రానిక్స్ & కమ్యూనికేషన్స్ శాఖ కార్యదర్శి *శ్రీ భాస్కర్ కాటమనేని* మాట్లాడుతూ.. ఏఐ వచ్చినంత మాత్రాన అది మనిషి ఆలోచనా శక్తిని పూర్తిగా భర్తీ చేయలేదని, మెకానికల్, ఎలక్ట్రికల్, కెమిస్ట్రీ, ఫిజిక్స్ వంటి ప్రాథమిక ఇంజినీరింగ్ నైపుణ్యాలకు ఎప్పటికీ డిమాండ్ ఉంటుందని స్పష్టం చేశారు. కళాశాలల నుంచి బయటకు వస్తున్న విద్యార్థుల్లో 24 శాతం మంది మాత్రమే నేరుగా పరిశ్రమల్లో పనిచేసే స్థాయిలో ఉన్నారని, మరో 28 శాతం మందికి 3-6 నెలల శిక్షణ అవసరమవుతోందని చెప్పారు. ఈ అంతరాన్ని పూడ్చేందుకు శ్రీసిటీలోని ‘క్రియా విశ్వవిద్యాలయం’ వంటి విద్యాసంస్థలను పరిశ్రమలతో అనుసంధానం చేస్తున్నామని తెలిపారు. ఆన్‌లైన్ విద్యతో పాటు ప్రత్యక్ష శిక్షణ తోడైతేనే విద్యార్థుల్లో ఏకాగ్రత, నైపుణ్యాలు పెరుగుతాయని, క్వాంటం టెక్నాలజీ వంటి భవిష్యత్ రంగాలపై కంపెనీలు దృష్టి పెట్టాలని సూచించారు.

*ప్రాంతీయ భాషల్లో శిక్షణతో గ్రామీణ యువతకు ఊతం: డాక్టర్ సుచిత్ర కె. ఎల్ల*
సమన్వయకర్త డాక్టర్ సుచిత్ర కె. ఎల్ల (సీఐఐ నియుక్త అధ్యక్షురాలు; భారత్ బయోటెక్ సహ వ్యవస్థాపకురాలు, ఎండీ) మాట్లాడుతూ.. 2030 నాటికి ప్రపంచవ్యాప్తంగా 40 శాతం ఉద్యోగ నైపుణ్యాలు మారిపోతాయని, భారత్ ప్రపంచ నైపుణ్య కేంద్రంగా ఎదిగేందుకు ఇదే సరైన సమయమని అన్నారు. ఆంగ్ల భాష రాకపోవడం నైపుణ్యాభివృద్ధికి అడ్డంకి కాకూడదని, ఏఐ ఆధారిత సాధనాల ద్వారా ప్రాంతీయ భాషల్లో శిక్షణ అందిస్తే గ్రామీణ యువత అద్భుతాలు సృష్టిస్తుందని చెప్పారు.

*అంతర్జాతీయ నిపుణుల సూచనలు:*

* *డాక్టర్ శైలా తల్లూరి* (ప్యూర్ గ్లోబల్ వ్యవస్థాపకురాలు & సీఈవో, అమెరికా): ఏఐ యుగంలోనూ మానవీయ కోణం (ఎంపతీ), సరైన నిర్ణయం తీసుకునే సామర్థ్యం (జడ్జిమెంట్) అత్యంత కీలకమని, విద్యార్థులు కేవలం చదువుకే పరిమితం కాకుండా ఇంటర్న్‌షిప్‌లు, డిజైన్ థింకింగ్ ద్వారా ప్రాక్టికల్ అనుభవం గడించాలని సూచించారు.

* శిరీష వోరుగంటి* (లాయిడ్స్ బ్యాంకింగ్ గ్రూప్ మేనేజింగ్ డైరెక్టర్ & సీఈవో): గ్లోబల్ కేపబిలిటీ సెంటర్ల (జీసీసీ) ద్వారా దేశంలో 20 లక్షల మందికి ఉపాధి లభిస్తోందని, పరిశ్రమలు–విద్యాసంస్థల మధ్య బంధం మరింత బలోపేతమైతే ప్రపంచ స్థాయి సమస్యలను పరిష్కరించే సత్తా మన యువతకు ఉందని అన్నారు.

*ప్రొఫెసర్ సైమన్ బిగ్స్* (జేమ్స్ కుక్ విశ్వవిద్యాలయం వైస్ ఛాన్సలర్ & ప్రెసిడెంట్, ఆస్ట్రేలియా): ఏఐ సాంకేతికతతో వ్యక్తుల అనుభవాన్ని, ప్రస్తుత నైపుణ్యాలను అంచనా వేసి, వారి అవసరాలకు తగ్గట్టుగా ‘పర్సనలైజ్డ్ లెర్నింగ్’ కోర్సులను రూపొందించవచ్చని వివరించారు.