హైడ్రాపై కేటీఆర్‌ది తప్పుడు ప్రచారంః టీపీసీసీ చీఫ్ మహేష్ కుమార్ గౌడ్
సూర్య, తెలంగాణ బ్యూరో ప్రతినిధిః బీఆర్ఎస్ వర్కింగ్ ప్రెసిడెంట్ కేటీఆర్‌ విమర్శలకు టీపీసీసీ అధ్యక్షుడు మహేష్ కుమార్ గౌడ్ ఘాటుగా కౌంటర్ ఇచ్చారు. కేటీఆర్‌ మాట్లాడే ముందు బీఆర్ఎస్ పదేళ్ల పాలనలో ప్రజలకు ఇచ్చిన హామీలు, వాటి అమలుపై ఆత్మపరిశీలన చేసుకోవాలని సూచించారు. దళితుడిని ముఖ్యమంత్రిని చేస్తానని హామీ ఇచ్చి, దళితుడిని ఉప ముఖ్యమంత్రిగా నియమించిన కొద్దికాలానికే రాత్రికి రాత్రే పదవి నుంచి తొలగించిన చరిత్ర బీఆర్ఎస్‌దేనని విమర్శించారు. హైడ్రా పేరుతో ఇళ్ల కూల్చివేతలు జరుగుతున్నాయంటూ కేటీఆర్‌ ఎక్స్‌ వేదికగా తప్పుడు ప్రచారం చేస్తున్నారని మహేష్ కుమార్ గౌడ్ మండిపడ్డారు. ఒక్క ఇల్లు కూల్చినట్లు నిరూపించినా చర్చకు సిద్ధంగా ఉన్నానని సవాల్ విసిరారు. బీఆర్ఎస్‌కు ప్రజాదరణ క్రమంగా తగ్గిపోతోందనడానికి ఇటీవల నిర్మల్‌లో జరిగిన సభే నిదర్శనమని వ్యాఖ్యానించారు. హైదరాబాద్‌లో జరిగిన భారత్ సమ్మిట్ విజయాన్ని చూసి ఓర్వలేక బీఆర్ఎస్ నేతలు రాజకీయ విమర్శలకు దిగుతున్నారని, సమ్మిట్‌పై వారు చేస్తున్న ఆరోపణలు అసూయతో కూడుకున్నవని అన్నారు. మరోవైపు, మోదీ ప్రభుత్వం జర్నలిస్టుల వీసాలను రద్దు చేయడం ప్రపంచవ్యాప్తంగా ఖండించాల్సిన అంశమని మహేష్ కుమార్ గౌడ్ పేర్కొన్నారు. జర్నలిస్టుల వీసాల రద్దును ప్రపంచవ్యాప్తంగా ఉన్న మీడియా ప్రతినిధులు ఖండించాలని పిలుపునిచ్చారు.
ఎ.రవీందర్‌: హైదరాబాద్‌.
