సర్కార్ భూమి జోలికొస్తే అంతే అమీన్పూర్ పర్యటనలో కలెక్టర్ హెచ్చరిక
అమీన్పూర్ ; ప్రభుత్వ భూముల పరిరక్షణలో రాజీ పడే ప్రసక్తే లేదని, ప్రభుత్వ భూములను ఆక్రమించే వారిపై కఠిన చర్యలు తీసుకుంటామని జిల్లా కలెక్టర్ ప్రతీక్‌ జైన్‌ హెచ్చరించారు. భూముల ఆక్రమణలు, లేఅవుట్లకు సంబంధించిన ఫిర్యాదులపై అధికారులు క్షేత్రస్థాయిలో విచారణ చేపట్టి వాస్తవాలను నిర్ధారించాలని స్పష్టం చేశారు. ఈ క్రమంలో గురువారం అమీన్పూర్ రెవెన్యూ పరిధిలో పర్యటించిన కలెక్టర్.. బాధితుల ఫిర్యాదులను స్వయంగా పరిశీలించి, భూముల వివరాలను అధికారులను అడిగి తెలుసుకున్నారు.
సర్వే నంబర్‌ 1064లో పరిశీలన
అమీన్పూర్ రెవెన్యూ పరిధిలోని సర్వే నంబర్‌ 1064లో గతంలో నారాయణరావు ఏర్పాటు చేసిన లేఅవుట్‌కు సంబంధించి బాధితులు చేసిన ఫిర్యాదుల మేరకు కలెక్టర్ ప్రతీక్‌ జైన్‌ సంయుక్త కలెక్టర్ సంగీతతో కలిసి సంఘటనా స్థలాన్ని పరిశీలించారు. లేఅవుట్‌ వ్యవహారానికి సంబంధించి బాధితులతో సమావేశమై వారి సమస్యలను అడిగి తెలుసుకున్నారు. బాధితులు తెలిపిన వివరాలను సేకరించి, ఫిర్యాదులపై క్షేత్రస్థాయి పరిస్థితులను పరిశీలించారు. భూమికి సంబంధించిన అంశాలపై వాస్తవాలను నిర్ధారించేందుకు అవసరమైన వివరాలను అధికారుల నుంచి తెలుసుకున్నారు.
జీఓ 59 దరఖాస్తుల పరిశీలన
అనంతరం సుల్తాన్‌పూర్‌ రెవెన్యూ పరిధిలోని గండిగూడెం శివారులో ఉన్న సర్వే నంబర్‌ 330 ను కలెక్టర్ పరిశీలించారు. జీఓ 59 కింద దరఖాస్తు చేసుకున్న నిర్మాణాలను క్షేత్రస్థాయిలో తనిఖీ చేశారు. ఆయా నిర్మాణాలకు సంబంధించిన వివరాలు, దరఖాస్తుల స్థితిగతులపై అధికారులతో చర్చించారు. ప్రభుత్వ నిబంధనలకు అనుగుణంగా పరిశీలన చేపట్టాలని సూచించారు.
ఆక్రమణలపై ఉక్కుపాదం
ప్రభుత్వ భూములను కాపాడేందుకు పకడ్బందీ చర్యలు తీసుకుంటున్నామని ఈ సందర్భంగా కలెక్టర్ తెలిపారు. ప్రభుత్వ భూములను ఎవరైనా ఆక్రమించినట్లు గుర్తిస్తే నిబంధనల ప్రకారం కఠిన చర్యలు తీసుకుంటామని హెచ్చరించారు. భూములకు సంబంధించిన ఫిర్యాదులను నిర్లక్ష్యం చేయకుండా పరిశీలించి, వాస్తవాల ఆధారంగా చర్యలు తీసుకోవాలని అధికారులకు సూచించారు.
ఈ పర్యటనలో అమీన్పూర్ తహశీల్దార్‌ వెంకటేశ్‌, రెవెన్యూ సిబ్బంది తదితరులు పాల్గొన్నారు.
