విశ్వక్ సేన్ కల్ట్ సినిమా రిలీజ్ ట్రైలర్ లాంచ్, వైల్డ్ ఎక్స్‌పీరియన్స్ ఇస్తుందన్న మాస్ కా దాస్
సూర్య ఎంటర్‌టైన్‌మెంట్ డెస్క్: టాలీవుడ్ మాస్ కా దాస్ విశ్వక్ సేన్ స్వీయ దర్శకత్వంలో నటిస్తూ తెరకెక్కించిన తాజా గ్లోబల్ స్లాషర్ ఫిల్మ్ కల్ట్ ప్రేక్షకుల ముందుకు వచ్చేందుకు సిద్ధమైంది. తారక్ సినిమాస్ బ్యానర్‌పై సందీప్ కకరాల నిర్మిస్తున్న ఈ సినిమాపై టాలీవుడ్‌లో భారీ అంచనాలు నెలకొన్నాయి. వాస్తవ జీవితంలోని కలవరపరిచే ఘటనల స్ఫూర్తితో ఇండియాలోనే తొలి ఒరిజినల్ స్లాషర్ థ్రిల్లర్‌గా ఈ చిత్రాన్ని రూపొందించారు. సినిమా విడుదలకు ఒక్క రోజు మాత్రమే సమయం ఉండటంతో మేకర్స్ తాజాగా రిలీజ్ ట్రైలర్‌ను గ్రాండ్‌గా లాంచ్ చేశారు. ఈ ట్రైలర్ లాంచ్ ఈవెంట్‌లో చిత్ర యూనిట్ పాల్గొని సినిమా విశేషాలను పంచుకున్నారు.
ఈ చిత్రంలో విశ్వక్ సేన్ డీఎస్పీ సంకల్ప్ నాయక్ అనే శక్తివంతమైన పాత్రలో కనిపించనున్నారు. గోవా నేపథ్యంలో సాగే ఈ కథలో స్థానికులు ఇతర ప్రాంతాల నుంచి వచ్చినవారిని, ముఖ్యంగా తెలుగు వారిని ఇబ్బంది పెట్టడాన్ని సహించని నిజాయితీ గల పోలీస్ అధికారిగా ఆయన నటిస్తున్నారు. గోవాకు బదిలీపై వెళ్ళిన సంకల్ప్ నాయక్ అక్కడ ఎలాంటి పరిస్థితులను ఎదుర్కొన్నాడు, పార్టీ నేపథ్యంలో సాగే హత్యాకాండ చుట్టూ కథ ఎలా తిరుగుతుందనే ఆసక్తికర అంశాలను ట్రైలర్‌లో చూపించారు. యాక్షన్, స్లాషర్ ఎలిమెంట్స్ తో కూడిన ఈ ట్రైలర్ ప్రేక్షకులలో గూస్‌బంప్స్ తెప్పించేలా ఉంది. కార్టూన్ తరహా విజువల్ ట్రీట్‌మెంట్‌తో స్లాషర్ ఎలిమెంట్స్‌ను చాలా విభిన్నంగా తెరకెక్కించినట్లు తెలుస్తోంది.
ఈ చిత్రంలో మురళీ శర్మ రాజకీయ నాయకుడిగా నటించగా, శ్రీకాంత్ అయ్యంగార్ సీనియర్ పోలీస్ అధికారిక పాత్ర పోషించారు. వీరితో పాటు గాయత్రి భరద్వాజ్, తారక్ పొన్నప్ప, కార్తికేయ తదితరులు కీలక పాత్రలలో కనిపించనున్నారు. ఈ సినిమాకు తరుణ్ భాస్కర్ సంభాషణలు అందించగా, రవి బస్రూర్ అందించిన ఎలక్ట్రిఫైయింగ్ బ్యాక్‌గ్రౌండ్ స్కోర్ సినిమా స్థాయిని మరింత పెంచిందని ట్రైలర్ చూస్తే స్పష్టమవుతోంది. సాంకేతిక నిపుణుల ప్రతిభ సినిమాకు ప్రధాన బలంగా నిలవనుందని చిత్ర యూనిట్ ధీమా వ్యక్తం చేసింది.
రిలీజ్ ట్రైలర్ లాంచ్ ఈవెంట్‌లో హీరో, దర్శకుడు విశ్వక్ సేన్ మాట్లాడుతూ సినిమా గురించి పలు ఆసక్తికర విషయాలు పంచుకున్నారు. ఈ సినిమా ప్రేక్షకులకు ఒక సరికొత్త సినిమాటిక్ అనుభూతిని ఇస్తుందని, ముఖ్యంగా సెకండాఫ్‌లో వచ్చే 45 నిమిషాలు అడ్రినలిన్ హై ఇస్తుందని తెలిపారు. సున్నిత మనస్కులు, చిన్న పిల్లలు ఈ సినిమాకు దూరంగా ఉండాలని, ఇది చాలా వైల్డ్ సినిమా అని ఆయన పేర్కొన్నారు. త్వరలో ప్రపంచవ్యాప్తంగా తెలుగు, హిందీ, ఇంగ్లిష్, జపనీస్, స్పానిష్ భాషల్లో ఏకకాలంలో విడుదల కానున్న ఈ సినిమా థియేటర్లలో ప్రేక్షకులకు సరికొత్త అనుభూతిని పంచుతుందని ఆశిద్దాం.
