పాఠశాలల పరిసరాలు పరిశుభ్రంగా ఉండాలి

మండలవిద్యాశాఖాధికారి కే.నరేష్

నక్కపల్లి:మేజర్ న్యూస్:అక్టోబరు 29:గత మూడురోజులుగా  మన ప్రాంతాన్ని వణికించిన ఆర్నాబ్ తుఫాన్ ప్రభావం నేటితో తొలగిపోవడంతో నేటి నుండి పాఠశాలలు పున:ప్రారంభమవుతున్న నేపధ్యంలో ఉపాధ్యాయులు  పాఠశాల పరిసరాల పట్ల అప్రమత్తంగా ఉండాలని స్ధానిక మండల విద్యాశాఖాధికారి కే.నరేష్ తెలిపారు.మూడురోజులుగా కురిసిన వర్షాలు,భారీ గాలులు వీయడంతో  పాఠశాలల పరిసరాలలో అనేకరకముల ప్రమాదాలు పొంచి ఉండే అవకాశం ఉందని, విద్యార్ధులను తడిచిన గోడలు,శిధిలావస్థలో ఉన్న భవనాలు, గుజ్జుగా ఎదిగిన చెట్లవద్ద సంచరించకుండా తగుజాగ్రత్తలు పాటించాలన్నారు.పాఠశాలలు తెరిచిన వెంటనే నిరంతర తడి వ్యర్ధాలవలన పరిసరాలు తడిచిపోవడంతో విషసర్పాలు సంచరించే ప్రమాదం పొంచి ఉందని అప్రమత్తంగా ఉండాలన్నారు.ఎక్కడైనా అనుమానాస్పద వస్తువులు ,విష సర్పాలు కనిపిస్తే పూర్తిగా తొలగించిన తరువాతే పిల్లలను కూర్చోబెట్టాలన్నారు.ఎడతెరిపిలేని వర్షాలకు తరగతి గది భవనాల పైకప్పులు,గోడలు పెచ్చులూడి పడే అవకాశం ఉందని అటువంటి గదులకు తాళం వేసి విద్యార్ధులను అక్కడ సంచరించకుండా చూడాలన్నారు.పాఠశాల ప్రాంగణంలో పేరుకుపోయిన చెత్త చెదారం,విరిగిన చెట్ల కొమ్మలను వెంటనే తొలగించాలన్నారు.పాఠశాల ఆవరణ, కిచెన్ షెడ్ వంటి ప్రాంతాలలో బ్లీచింగ్ జల్లాలని,విద్యార్ధులకు మద్యాహ్నభోజనానికి కావలసిన కాయగూరలను రెండులేదా మూడుసార్లు  శుభ్రమైన నీటితో కడిగి వండి వడ్డించాలన్నారు.ఈ సందర్భంగా ఆయన పాఠశాలల ప్రధానోపాధ్యాయులకు,ఉపాధ్యాయులకు సూచనలు అందించారు.ఈ కార్యక్రమంలో ఎం ఈ వో 2 ఆర్.నాగన్నదొర  పాల్గొన్నారు