2,850 ఎకరాల్లో వరి పంటకు ముంపు

క్షేత్రస్థాయిలో పంటలను పరిశీలించిన వ్యవసాయ, రెవెన్యూ అధికారులు

మెలియాపుట్టి. అక్టోబర్ 29. మేజర్ న్యూస్....
తుఫాన్ ప్రభావంతో కురిసిన భారీ వర్షాలుకు ముంపునకు గురైన వరి పొలాలను వ్యవసాయ, రెవెన్యూ అధికారులు గురువారం క్షేత్రస్థాయిలో పరిశీలించారు. మెలియాపుట్టి మండలంలోని 38 రెవెన్యూ గ్రామాల పరిధిలో సుమారు 2,850 ఎకరాల్లో వరి పంట ముంపునకు గురైనట్లు ప్రాథమికంగా అంచనా వేసి, నివేదికను ఉన్నతాధికారులకు పంపించినట్లు మండల వ్యవసాయ అధికారి ఎస్‌. దానకర్ణుడు తెలిపారు.
మెలియాపుట్టి మండలంలోని చాపర, మెలియాపుట్టి, పెద్దపద్మాపురం, సిరియాకండి, దొరబలాపురం, కోసమాల, వసుంధర, గంగరాజుపురం, జోడూరు, జాడపల్లి, ఎంసీపీకొత్తూరు తదితర గ్రామాల్లో అధికారులు పర్యటించి పంట నష్టాన్ని పరిశీలించారు. వరి పొలాల్లో నిలిచిన నీరు, పంట పరిస్థితిని పరిశీలించి రైతులకు పలు సూచనలు చేశారు. ముంపు కారణంగా పంట దెబ్బతినకుండా తగిన జాగ్రత్తలు తీసుకోవాలని సూచించారు.
వరి పొలాల్లో నిల్వ ఉన్న నీటిని బయటకు పంపించేందుకు రైతులు చర్యలు చేపట్టాలని వ్యవసాయ అధికారి దానకర్ణుడు సూచించారు. పొలాల్లో నీరు తగ్గిన వెంటనే ఎకరాకు హెక్సాకొనజోల్‌ 400 మి.లీ. లేదా ప్రొపికొనజోల్‌ 200 మి.లీ. చొప్పున పిచికారీ చేసుకోవాలని తెలిపారు. దీనివల్ల పంటకు తెగుళ్లు సోకకుండా నివారణ చర్యలు చేపట్టవచ్చని వివరించారు.
వర్షాలకు వరి పంట నేలకొరిగిన పొలాల్లో వరి కంకులను నిలబెట్టి కట్టలుగా కట్టుకోవాలని అధికారులు సూచించారు. అనంతరం ఐదు శాతం ఉప్పు ద్రావణాన్ని పిచికారీ చేయడం ద్వారా ధాన్యం రంగు మారకుండా, మొలకెత్తకుండా నివారించవచ్చని తెలిపారు. పంట పరిస్థితిని బట్టి వ్యవసాయ శాఖ అధికారుల సూచనలు పాటించాలని రైతులకు సూచించారు. ఈ పరిశీలనలో గ్రామ వ్యవసాయ సహాయకులు జగదీష్‌, ప్రేమ, నిహారిక, పుష్ప, త్రినాథ్‌, పల్లవి తదితరులు, పలువురు రైతులు పాల్గొన్నారు.