శ్రీకాకుళం తీరప్రాంత పరిరక్షణకు పెద్దపీట..

- నష్టపోయిన ప్రతి రైతుకూ అండగా నిలుస్తాం
- కోతకు గురైన తీరాన్ని, నీటమునిగిన పంటలను పరిశీలించిన ఎమ్మెల్యే గొండు శంకర్.

శ్రీకాకుళం అక్టోబర్ 29 మేజర్ న్యూస్  :
శ్రీకాకుళం రూరల్ మండలం పరిధిలోని పలు గ్రామాల్లో గురువారం శ్రీకాకుళం శాసనసభ్యులు  గొండు శంకర్  విస్తృతంగా పర్యటించారు. సముద్రం కోతకు గురవుతున్న పి.జి.పేట తీరప్రాంతంతో పాటుగా, ఇటీవల కురిసిన వర్షాలకు నీటమునిగిన కిల్లిపాలెం, వాడాడ పంచాయతీల పరిధిలోని పంట పొలాలను ఆయన స్వయంగా క్షేత్రస్థాయిలో పరిశీలించారు. ప్రజలు, రైతుల పక్షాన నిలబడి వారి సమస్యలను అడిగి తెలుసుకున్న ఆయన, తక్షణ సహాయక చర్యలు, భవిష్యత్ ప్రణాళికలపై అధికారులకు కీలక ఆదేశాలు జారీ చేశారు.
పి.జి.పేట తీరంలో సముద్రం కోతకు గురవుతున్న తీరును నిశితంగా పరిశీలించిన ఎమ్మెల్యే శంకర్... తీర పరిరక్షణకు పటిష్టమైన, శాశ్వత చర్యలు చేపట్టనున్నట్లు వెల్లడించారు. గతంలో తీర రక్షణ కోసం నిర్మించిన రాతి కట్టడం వల్ల ఇప్పటికే గ్రామానికి చాలావరకు రక్షణ లభించిందని ఆయన గుర్తుచేశారు. ఈ రక్షణ వ్యవస్థను మరింత పటిష్టం చేసే దిశగా.. ప్రస్తుతం ఉన్న 'ఎల్ (L)' ఆకారపు గ్రోయిన్‌ను మరో 50 మీటర్ల మేర పొడిగించడంతో పాటు, దానికి సరిగ్గా సమాంతరంగా ఇంకొక గ్రోయిన్‌ను నిర్మించాల్సిన ఆవశ్యకతను నొక్కి చెప్పారు. ఇందుకు సంబంధించి ఇప్పటికే మంజూరైన రూ.50 లక్షల నిధులతో పనులను శరవేగంగా పూర్తి చేయాలని ఆయన ఆదేశించారు. ఇదే క్రమంలో అక్కడ సహజసిద్ధంగా ఏర్పడిన బీచ్‌ను స్థానికులకు, పర్యాటకులకు మరింత ఆహ్లాదాన్ని పంచేలా, అందరికీ అందుబాటులో ఉండేలా సుందరంగా తీర్చిదిద్దుతామని భరోసా ఇచ్చారు. ఈ పనుల్లో ఎలాంటి లోపాలు లేకుండా, మరింత పటిష్టంగా తీర రక్షణ చర్యలు చేపట్టేలా సంబంధిత ఇంజనీరింగ్, ఇతర శాఖల అధికారులతో అక్కడికక్కడే చర్చించి తగిన మార్పులు చేర్పులు సూచించారు.
అనంతరం కిల్లిపాలెం, వాడాడ పంచాయతీల పరిధిలో పర్యటించిన ఎమ్మెల్యే గొండు శంకర్ , ముంపునకు గురైన వరి (ఓడి) పంట పొలాల్లోకి దిగి పరిస్థితిని సమీక్షించారు. చేతికొచ్చే దశలో పంట నీటిపాలవ్వడంతో ఆందోళన చెందుతున్న రైతులను ఆయన ఓదార్చారు. ప్రకృతి కన్నెర్ర చేసినా అన్నదాతలు అధైర్యపడవద్దని, ప్రభుత్వం అన్ని విధాలుగా అండగా ఉంటుందని ధైర్యం చెప్పారు. వెంటనే వ్యవసాయ, రెవెన్యూ శాఖ అధికారులతో మాట్లాడి, ముంపునకు గురైన పంట నష్టాన్ని అత్యంత పారదర్శకంగా అంచనా వేయాలని ఆదేశించారు. ఏ ఒక్క రైతూ నష్టపోకుండా చూస్తామని, నివేదికలు అందిన వెంటనే ప్రభుత్వ పరంగా రైతులను ఆదుకునేందుకు అవసరమైన అన్ని చర్యలూ తక్షణమే చేపడతామని ఎమ్మెల్యే ఈ సందర్భంగా స్పష్టం చేశారు.