ప్రజావాణికి ప్రజల స్పందన కరువు..!

సూర్య, నాగిరెడ్డి పేట్,ప్రజా సమస్యల పరిష్కారం కోసం నిర్వహిస్తున్న ప్రజావాణి కార్యక్రమానికి ప్రజల నుంచి స్పందన కరువవుతోంది. సోమవారం మండల పరిషత్ కార్యాలయంలో నిర్వహించే ప్రజావాణి కార్యక్రమానికి దరఖాస్తుదారులు ఒక్కరు కూడా రాకపోవడంతో అధికారులు గంటల తరబడి ఖాళీగా వేచి చూడాల్సిన పరిస్థితి నెలకొంటోంది. సుమారు నాలుగు గంటలపాటు ప్రజల కోసం కేటాయించిన సమయంలో ప్రజల నుంచి ఫిర్యాదులు అందకపోవడంతో అధికారులు తమ విధులను పక్కనపెట్టి దరఖాస్తుదారుల రాక కోసం నిరీక్షించాల్సి వస్తోంది.‌ మండల స్థాయి ప్రజల సమస్యలను నేరుగా తెలుసుకుని వాటిని పరిష్కరించేందుకు ప్రభుత్వం ప్రతి సోమవారం మండల పరిషత్ కార్యాలయంలో  ప్రజావాణి కార్యక్రమాన్ని నిర్వహిస్తున్నప్పటికీ, క్షేత్రస్థాయిలో దీనిపై ప్రజలకు సరైన అవగాహన లేకపోవడం, ప్రజలు తమ సమస్యలను సంబంధిత శాఖల వద్దనే నేరుగా అధికారులకు తెలియపరుస్తుండడం,వాటిని పరిష్కరించుకునే ప్రయత్నం చేయడం వంటి కారణాలతో ప్రజావాణికి వచ్చే దరఖాస్తుదారుల సంఖ్య తగ్గుతుంది. దీంతో ప్రజా సమస్యల పరిష్కారం కోసం మండల స్థాయిలో వారం వారం ఏర్పాటు చేస్తున్న ప్రజావాణికి‌  దరఖాస్తుదారులు రాక ప్రజావాణి ప్రత్యేక హాల్ వెలవెలబోతోంది. ప్రజావాణికి అధికారులు తప్పనిసరిగా హాజరై ప్రజల నుంచి ఫిర్యాదులు స్వీకరించాల్సి ఉండగా, ఫిర్యాదుదారులు రాకపోవడంతో సమయం మొత్తం అక్కడే కూర్చోవాల్సిన పరిస్థితి ఏర్పడుతోంది. తమ సమస్యలను మండల స్థాయి అధికారులకు తెలియపరిస్తే సమస్య పరిష్కారం అవుతుందో లేదో నాన్న కారణంగా పలువురు మండల వాసులు జిల్లా కేంద్రంలో నిర్వహించే ప్రజావాణి కార్యక్రమానికి వెళ్లి తమ సమస్యలను జిల్లా ఉన్నతాధికారుల దృష్టికి తీసుకెళ్తున్నారు. ప్రజావాణికి వచ్చే దరఖాస్తులను జిల్లా ఉన్నత అధికారులు సమస్యల పరిష్కారం కోసం మండల స్థాయి అధికారులను ఆదేశిస్తూండ డంతో పలు ప్రజా సమస్యలు పరిష్కారం అవుతున్నాయని పలువురు అభిప్రాయపడుతున్నారు. మండల స్థాయి ప్రజావాణి కార్యక్రమం సమర్థవంతంగా కొనసాగాలంటే 
ప్రజావాణి కార్యక్రమంపై  ప్రజలకు మరింత అవగాహన కల్పించడంతో పాటు, సమస్యల పరిష్కార ప్రక్రియపై విస్తృత ప్రచారం చేయాల్సిన అవసరం ఉందనే అభిప్రాయాలు వ్యక్తమవుతున్నాయి.