విజయవాడలో కూటమి సమష్టి కార్యాచరణ.. - అభ్యర్థి వంగవీటి రాధాకృష్ణ గెలుపునకు ప్రత్యేక వ్యూహం

విజయవాడ మేజర్ న్యూస్ : విజయవాడ నగరపాలక సంస్థ ఎన్నికల్లో కూటమి అభ్యర్థుల విజయమే లక్ష్యంగా సమష్టి కార్యాచరణతో ముందుకు సాగాలని కూటమి నేతలు నిర్ణయించారు. మేయర్ అభ్యర్థి వంగవీటి రాధాకృష్ణతో పాటు అన్ని వార్డుల్లోనూ విజయాలు సాధించేందుకు 100 శాతం ఫలితాలే లక్ష్యంగా పనిచేస్తామని విజయవాడ ఎంపీ కేశినేని శివనాథ్‌ చిన్ని తెలిపారు. సోమవారం తన కార్యాలయంలో వంగవీటి రాధాకృష్ణ, బుద్ధా వెంకన్న, పట్టాభితో కలిసి ఎన్నికల వ్యూహం, వార్డుల వారీగా ప్రచార ప్రణాళిక, అభ్యర్థుల విజయానికి చేపట్టాల్సిన చర్యలపై చర్చించారు. ఈ సందర్భంగా కేశినేని చిన్ని మాట్లాడుతూ వంగవీటి రాధాకృష్ణ మేయర్ అభ్యర్థిగా బరిలోకి దిగడం కూటమి నాయకులు, కార్యకర్తల్లో నూతనోత్సాహాన్ని నింపిందన్నారు. వంగవీటి కుటుంబానికి విజయవాడ రాజకీయాల్లో ప్రత్యేక గుర్తింపు ఉందని, రాధాకృష్ణ యువకుడని, మేయర్ పదవికి సరైన అభ్యర్థి అని పేర్కొన్నారు. ఆయన రికార్డు స్థాయి మెజారిటీతో విజయం సాధించేలా కూటమి శ్రేణులన్నీ సమష్టిగా కృషి చేస్తాయని ధీమా వ్యక్తం చేశారు. మంగళవారం నుంచి కూటమి నేతలంతా ప్రతి వార్డులో కలిసికట్టుగా పర్యటించి ప్రచారం నిర్వహిస్తారని తెలిపారు. వార్డుల వారీగా అభ్యర్థుల జాబితా సిద్ధమైందని, కూటమిలో రెబల్‌ అభ్యర్థుల సమస్య తలెత్తకుండా చర్యలు తీసుకుంటామని స్పష్టం చేశారు. టికెట్లు ఆశించి అవకాశం దక్కని నాయకులతో చర్చించి అందరినీ కలుపుకొని ముందుకు వెళ్తామని చెప్పారు. సమావేశంలో పాల్గొన్న వంగవీటి రాధాకృష్ణ స్థానిక సంస్థల ఎన్నికల్లో కూటమి అభ్యర్థుల విజయానికి అనుసరించాల్సిన వ్యూహం, ప్రచార కార్యాచరణపై నేతలతో చర్చించారు. విజయవాడ అభివృద్ధి, ప్రజా సమస్యల పరిష్కారానికి ప్రాధాన్యమిస్తూ కూటమి శ్రేణులన్నీ సమన్వయంతో పనిచేయాల్సిన అవసరాన్ని ప్రస్తావించారు. మేయర్ అభ్యర్థిగా తన విజయంతో పాటు అన్ని వార్డుల్లో కూటమి అభ్యర్థుల గెలుపునకు నాయకులు, కార్యకర్తలు సమష్టిగా కృషి చేయాలని ఆకాంక్షించారు. బుద్ధా వెంకన్న, పట్టాభి కూడా వార్డుల వారీగా ప్రచార ప్రణాళిక, నాయకులు, కార్యకర్తల సమన్వయం, టికెట్లు ఆశించిన వారిని కలుపుకొని ముందుకు వెళ్లే అంశాలపై చర్చించారు. కూటమి ఐక్యతను బలోపేతం చేస్తూ అన్ని స్థానాల్లోనూ అభ్యర్థుల విజయానికి కృషి చేయాలని సమావేశంలో నిర్ణయించారు.

స్టాఫ్ రిపోర్టర్: ✍️ ప్రేమ్ రాజ్, విజయవాడ, ఎన్టీఆర్ జిల్లా.