మెట్లకుంట పీఏసీఎస్ చైర్మన్ జయకృష్ణ కన్నుమూత
బొంరాస్పేట్, మేజర్ న్యూస్: మండల పరిధిలోని మెట్లకుంట ప్రాథమిక వ్యవసాయ సహకార సంఘం (పీఏసీఎస్) చైర్మన్ జయకృష్ణ మృతి చెందారు. గత కొంతకాలంగా అనారోగ్యంతో బాధపడుతున్న ఆయన హైదరాబాద్లోని ఓ ప్రముఖ ప్రైవేటు ఆసుపత్రిలో చికిత్స పొందారు. ఇటీవల ఆరోగ్యం కొంత మెరుగుపడటంతో ఇంటికి చేరుకున్నారు. ఈ క్రమంలో ఆదివారం శ్వాస తీసుకోవడంలో ఇబ్బంది తలెత్తడంతో కుటుంబ సభ్యులు ఆయనను హైదరాబాద్లోని మెడికవర్ ఆసుపత్రికి తరలించారు. అక్కడ చికిత్స పొందుతూ సోమవారం తెల్లవారుజామున 1.30 గంటల సమయంలో తుదిశ్వాస విడిచినట్లు ఆయన సోదరుడు కన్నయ్య తెలిపారు.జయకృష్ణ మృతి వార్త తెలియడంతో మెట్లకుంట గ్రామంలో విషాదఛాయలు అలుముకున్నాయి. ఆయన మరణవార్తతో కుటుంబ సభ్యులు కన్నీరుమున్నీరయ్యారు. మండలానికి చెందిన పలువురు ప్రముఖ నాయకులు, ప్రజాప్రతినిధులు, సహచర నాయకులు, స్నేహితులు, శ్రేయోభిలాషులు తీవ్ర దిగ్భ్రాంతి వ్యక్తం చేశారు. ఆప్తమిత్రుడిని కోల్పోయామని, మా నుంచి దూరమయ్యావా మిత్రమా.. నీవు లేని లోటును ఎలా భరించాలంటూ భావోద్వేగానికి గురయ్యారు. ఆయనతో తమకున్న అనుబంధాన్ని గుర్తుచేసుకుంటూ కన్నీటిపర్యంతమయ్యారు. నేడు అంత్యక్రియలు నిర్వహించనున్నట్లు కుటుంబ సభ్యులు తెలిపారు.