పెరిగిన బియ్యం ధరలను తక్షణమే అదుపు చేయాలి

హనుమకొండ టౌన్, మేజర్ న్యూస్, రాష్ట్రంలో విపరీతంగా పెరిగిపోయిన బియ్యం, నిత్యావసర సరుకుల ధరలను ప్రభుత్వం తక్షణమే అదుపు చేయాలని భారత కమ్యూనిస్టు పార్టీ  సిపిఐ రాష్ట్ర సహాయ కార్యదర్శి తక్కళ్లపల్లి శ్రీనివాస్ రావు డిమాండ్ చేశారు. ఆదివారం హనుమకొండ బాలసముద్రంలోని సిపిఐ జిల్లా కార్యాలయంలో జరిగిన హనుమకొండ జిల్లా సిపిఐ శాఖ కార్యదర్శుల సమావేశంలో ఆయన ముఖ్య అతిథిగా పాల్గొని ప్రసంగించారు.
సమావేశానికి నెడినూరి రాజమౌళి అధ్యక్షత వహించారు.
ఈ సందర్భంగా తక్కళ్లపల్లి శ్రీనివాస్ రావు మాట్లాడుతూ మార్కెట్లో బియ్యం ధరలు ఆకాశాన్ని అంటడంతో సామాన్య, మధ్యతరగతి ప్రజలు తీవ్ర ఆర్థిక ఇబ్బందులు ఎదుర్కొంటున్నారని ఆవేదన వ్యక్తం చేశారు. పెరిగిన ధరల వల్ల పేద ప్రజల బతుకు భారంగా మారిందని పేర్కొన్నారు. ప్రభుత్వం తక్షణమే స్పందించి బియ్యం ధరల నియంత్రణకు కఠిన చర్యలు తీసుకోవాలని, బ్లాక్ మార్కెటింగ్‌ను అరికట్టాలని కోరారు.
బియ్యం తదితర నిత్యవసర వస్తువులను అక్రమంగా నిలువ చేసిన వ్యాపారస్తులపై పిడి ఆక్ట్ పెట్టి అరెస్టు చేసి చట్టప్రకారం శిక్షించాలని డిమాండ్ చేశారు. బియ్యం ధరలు నియంత్రించాలని డిమాండ్ చేస్తూ ఈనెల 17న హనుమకొండ జిల్లా వ్యాప్తంగా తహసిల్దార్ కార్యాలయాల ముందు ధర్నాలు చేపట్టనున్నట్లు సిపిఐ హనుమకొండ జిల్లా కార్యదర్శి కర్రే బిక్షపతి తెలిపారు.ప్రజలపై ధరల భారాన్ని తగ్గించేందుకు ప్రజా పంపిణీ వ్యవస్థ, రేషన్ దుకాణాల ద్వారా బియ్యంతో పాటు పప్పులు, వంట నూనె, చక్కెర తదితర అన్ని రకాల నిత్యావసర సరుకులను సబ్సిడీపై సరఫరా చేయాలని ఆయన ప్రభుత్వాన్ని డిమాండ్ చేశారు. లేనిపక్షంలో ప్రజా సమస్యల పరిష్కారం కోసం సిపిఐ ఆధ్వర్యంలో పెద్ద ఎత్తున ఆందోళన కార్యక్రమాలు చేపడతామని ఆయన హెచ్చరించారు. సమావేశంలో సిపిఐ హనుమకొండ జిల్లా కార్యదర్శి కర్రె భిక్షపతి, రాష్ట్ర సమితి సభ్యులు, జిల్లా కార్యవర్గ సభ్యులు అధరి శ్రీనివాస్,జిల్లా సహాయ కార్యదర్శి మధేల యెల్లేష్ వివిధ మండలాల మరియు పట్టణ శాఖ కార్యదర్శులు,అశోక్ స్టాలిన్,మాలోతు శంకర్,బత్తిని సదానందం,దుప్పటి సాంబయ్య,కొట్టిపాక రవి,జక్కు రాజు గౌడ్,వేల్పుల సారంగపాణి, పార్టీ నాయకులు పాల్గొన్నారు.

రిపోర్టర్ :రమేష్, హనుమకొండ, హనుమకొండ జిల్లా