స్వీడన్ రాజకీయాల్లో కీలక మలుపు:

                 ప్రభుత్వ ఏర్పాటుకు ప్రతిపక్ష నేత మాగ్డలీనా ఆండర్సన్‌కు సెంటర్ పార్టీ మద్దతు!

సూర్య గ్లోబల్ డెస్క్ (స్టాక్‌హోమ్): సెప్టెంబర్ 2026లో జరిగిన సార్వత్రిక ఎన్నికల తర్వాత గత రెండు నెలలుగా స్వీడన్‌లో కొనసాగుతున్న రాజకీయ ప్రతిష్టంభనకు తెరపడే సూచనలు కనిపిస్తున్నాయి. నూతన ప్రభుత్వ ఏర్పాటుకు సంబంధించి ప్రతిపక్ష 'సోషల్ డెమోక్రటిక్ పార్టీ'  నాయకురాలు మాగ్డలీనా ఆండర్సన్  ప్రతిపాదించిన ప్రణాళికకు మద్దతు ఇవ్వాలని కీలకమైన సెంటర్ పార్టీ' ఆదివారం (నవంబర్ 15, 2026) నిర్ణయించింది. ఆండర్సన్ ప్రతిపాదనతో ముందుకు వెళ్లాలని, తుది వివరాలపై చర్చలు జరపాలని తమ పార్టీ నిర్ణయించినట్లు సెంటర్ పార్టీ నాయకురాలు ఎలిజబెత్ థాండ్ రింగ్‌క్విస్ట్ స్వీడిష్ రేడియోకు వెల్లడించారు.

ఎన్నికల తర్వాత ప్రతిష్టంభన & సెంటర్ పార్టీ కీలక పాత్ర:
సెప్టెంబర్ 13న జరిగిన ఎన్నికల్లో మాగ్డలీనా ఆండర్సన్ నేతృత్వంలోని సెంటర్-లెఫ్ట్ కూటమి స్వల్ప మెజారిటీ సాధించడంతో, అప్పటి ప్రధాని ఉల్ఫ్ క్రిస్టర్సన్ రాజీనామా చేశారు. అయితే 349 స్థానాలున్న స్వీడన్ పార్లమెంట్  లో ప్రభుత్వ ఏర్పాటుకు కీలకమైన 'సెంటర్ పార్టీ' మద్దతు కోసం అటు వామపక్ష, ఇటు మితవాద  కూటములు తీవ్రంగా ప్రయత్నించాయి. ఎవరికి మద్దతు ఇవ్వాలో తేల్చుకోవడానికి శుక్రవారం నాటికి తమ ప్రణాళికలు సమర్పించాలని సెంటర్ పార్టీ ఇరు కూటములను కోరింది. చివరకు ఆదివారం నాడు ఆండర్సన్ ప్రతిపాదించిన పూర్తి ప్యాకేజీ వైపే మొగ్గు చూపుతున్నట్లు ప్రకటించింది.

ప్రభుత్వ ఏర్పాటుకు సెంటర్ పార్టీ పెట్టిన ప్రధాన షరతులు:
సోషల్ డెమోక్రాట్లు, సెంటర్ పార్టీ మరియు గ్రీన్ పార్టీ కలిసి సంకీర్ణ ప్రభుత్వాన్ని ఏర్పాటు చేయాలని, ఇందులో మాగ్డలీనా ఆండర్సన్ ప్రధానమంత్రిగా ఉండాలని సెంటర్ పార్టీ కోరుకుంటోంది. అయితే ఈ ప్రభుత్వానికి బయటి నుంచి మద్దతు  ఇవ్వాల్సిన వామపక్ష  పార్టీ' విషయంలో సెంటర్ పార్టీ కఠినమైన షరతు విధించింది. ప్రభుత్వంలో లెఫ్ట్ పార్టీకి ఎట్టి పరిస్థితుల్లోనూ మంత్రి పదవులు  ఇవ్వకూడదని, ఆ పార్టీ తన డిమాండ్‌ను వెనక్కి తీసుకునేలా ఆండర్సన్ ఒప్పించాలని సెంటర్ పార్టీ స్పష్టం చేసింది.

లెఫ్ట్ పార్టీ పట్టుదల & తదుపరి పరిణామాలు:
సెంటర్ పార్టీ నిర్ణయాన్ని మాగ్డలీనా ఆండర్సన్ మరియు గ్రీన్ పార్టీ స్వాగతించాయి. ప్రభుత్వ ఏర్పాటులో తదుపరి దశ చర్చలను ప్రారంభిస్తున్నట్లు ఆండర్సన్ ప్రకటించారు. అయితే, ప్రభుత్వానికి మద్దతు ఇవ్వాలంటే తమకు కూడా మంత్రివర్గంలో స్థానం కల్పించాల్సిందేనని లెఫ్ట్ పార్టీ మొదటి నుంచీ పట్టుబడుతోంది. ఈ నేపథ్యంలో లెఫ్ట్ పార్టీని ఆండర్సన్ ఏ విధంగా ఒప్పిస్తారు, త్వరలోనే స్వీడన్ ప్రధానిగా ఆమె మళ్లీ బాధ్యతలు చేపడతారా లేదా అన్నది అంతర్జాతీయ రాజకీయ వర్గాల్లో ఆసక్తికరంగా మారింది.