రైతుల కష్టాలకు సంఘీభావంగా వన సమారాధనకు విరామం...
ఈ ఏడాది కొత్తపేట నియోజకవర్గ కమ్మ కార్తీక వన సమారాధన రద్దు...
ఆలమూరు మేజర్ న్యూస్ :ప్రతి ఏటా అత్యంత వైభవంగా నిర్వహించే కొత్తపేట నియోజకవర్గ కాకతీయ కమ్మ మహాజన సంఘం కార్తీక వన సమారాధన కార్యక్రమానికి ఈ ఏడాది విరామం ప్రకటించారు. ఇటీవల వరుసగా సంభవించిన తుఫాన్ల కారణంగా రైతులు తీవ్రంగా నష్టపోయిన నేపథ్యంలో ఈ ఏడాది వన సమారాధన నిర్వహించకూడదని కొత్తపేట నియోజకవర్గ కమ్మ సంఘం పెద్దలు ఏకగ్రీవంగా నిర్ణయించారు. ఈ మేరకు జొన్నాడలో గొడవర్తి దుర్గాప్రసాద్ (బాబి) కార్యాలయం వద్ద కమ్మ సంఘం పెద్దలు సమావేశమయ్యారు. ఈ సందర్భంగా ప్రస్తుత పరిస్థితుల్లో రైతులు ఎదుర్కొంటున్న ఇబ్బందులను పరిగణనలోకి తీసుకుని, వారికి సంఘీభావంగా ఈ ఏడాది కార్తీక వన సమారాధన కార్యక్రమాన్ని నిర్వహించకూడదని నిర్ణయించారు. ప్రతి సంవత్సరం కమ్మ సంఘం ఆధ్వర్యంలో కుటుంబ సభ్యులు, బంధుమిత్రుల సమక్షంలో సంప్రదాయబద్ధంగా, ఉత్సాహంగా నిర్వహించే ఈ వేడుకకు ఈసారి విరామం ఇవ్వాలని నిర్ణయించడం విశేషం. ఈ సమావేశంలో కొత్తపేట నియోజకవర్గానికి చెందిన పలువురు కమ్మ సంఘం పెద్దలు పాల్గొన్నారు.
