మద్యం మత్తులో పాశవిక హత్య.. బాధిత కుటుంబాన్ని పరామర్శించిన జన విజ్ఞాన వేదిక

అంబాజీపేట మేజర్ న్యూస్ : మద్యానికి బానిసై విచక్షణ కోల్పోయిన ఓ వ్యక్తి కత్తితో అత్యంత పాశవికంగా దాడి చేయడంతో మామిడిశెట్టి సత్యనారాయణ ప్రాణాలు కోల్పోయిన ఘటన స్థానికంగా తీవ్ర విషాదాన్ని, కలకలాన్ని రేపింది. ఈ దారుణ ఘటనపై ఆదివారం జన విజ్ఞాన వేదిక (JVV) సభ్యుడు, మద్యపాన వ్యతిరేక ఉద్యమ నాయకుడు డాక్టర్ ఎన్. సూర్యనారాయణ బృందం మృతుడి నివాసానికి వెళ్లి సత్యనారాయణ కుటుంబ సభ్యులను పరామర్శించింది. దాడి జరిగిన తీరును, కుటుంబ పరిస్థితులను అడిగి తెలుసుకుని వారికి ప్రగాఢ సానుభూతి తెలియజేశారు.

ఈ సందర్భంగా డాక్టర్ ఎన్. సూర్యనారాయణ మాట్లాడుతూ సమాజంలో జరుగుతున్న అనేక నేరాలకు, అనర్థాలకు మద్యమే మూలకారణమని తీవ్ర ఆవేదన వ్యక్తం చేశారు. మద్యం మహమ్మారి కారణంగా ఎన్నో కుటుంబాలు రోడ్డున పడుతున్నాయని, అమాయకుల ప్రాణాలు గాలిలో కలిసిపోతున్నాయని అన్నారు. మద్యపాన వ్యసనాన్ని అరికట్టేందుకు ప్రజల్లో విస్తృత స్థాయిలో చైతన్యం తీసుకురావాల్సిన అవసరం ఎంతైనా ఉందని ఆయన పిలుపునిచ్చారు. ఈ పరామర్శ కార్యక్రమంలో నల్లా సూర్యప్రకాష్, శరత్ తదితరులు పాల్గొని బాధిత కుటుంబానికి అండగా నిలిచారు.