ఇంటి వద్దకే సమగ్ర వైద్యం.. హనుమకొండలో ఘనంగా మెడివాకర్స్ డిజిటల్ హెల్త్ ప్లాట్ఫామ్ ప్రారంభం!
సూర్య తెలంగాణ డెస్క్: ప్రజలందరికీ నాణ్యమైన, సమగ్రమైన వైద్య సేవలను మరింత సులభంగా చేరువ చేసే లక్ష్యంతో ఆరోగ్య రంగంలో సరికొత్త డిజిటల్ వేదిక అందుబాటులోకి వచ్చింది. కేర్ బియాండ్ బార్డర్స్ అనే ప్రధాన ధ్యేయంతో సాంకేతికతను, వైద్యాన్ని అనుసంధానిస్తూ మెడివాకర్స్ సంస్థ రూపొందించిన సమగ్ర డిజిటల్ హెల్త్ ప్లాట్ఫామ్ ప్రారంభోత్సవ కార్యక్రమం హనుమకొండలోని మినర్వా గ్రాండ్లో ఘనంగా జరిగింది. ది ఫ్యూచర్ ఆఫ్ కేర్ స్టార్ట్స్ హియర్ అనే నినాదంతో ప్రారంభమైన ఈ వేడుకలో పలువురు వైద్యులు, ఫార్మసిస్టులు, డయాగ్నోస్టిక్ కేంద్రాల ప్రతినిధులు పాల్గొన్నారు.
ఈ సందర్భంగా మెడివాకర్స్ సంస్థ వ్యవస్థాపకులు మల్లారెడ్డి ఆలుమల్ల మాట్లాడుతూ, నేటి వేగవంతమైన జీవనశైలిలో ప్రజలకు సమయానికి సరైన వైద్య సలహాలు, సేవలు అందడం ఎంతో ముఖ్యమని పేర్కొన్నారు. ఈ అవసరాన్ని గుర్తించి రోగులు తమ ఇంటి నుంచే సమస్త వైద్య సేవలను పొందేలా ఈ డిజిటల్ వేదికను తీర్చిదిద్దామని వివరించారు. దీని ద్వారా నిపుణులైన వైద్యులతో నేరుగా ఆన్లైన్ సంప్రదింపులు జరపడంతో పాటు, క్లిష్టమైన ఆరోగ్య సమస్యలకు సెకండ్ ఒపీనియన్ తీసుకునే వెసులుబాటు కలుగుతుందని తెలిపారు.
ఆన్లైన్ వైద్య సేవలతో పాటు వ్యాధి నిర్ధారణ పరీక్షలు, ఇంటి వద్దకే మందులు అందించే ఫార్మసీ సేవలు, పూర్తిస్థాయి ఆరోగ్య పరీక్షల ప్యాకేజీలు, రోగుల సంరక్షణకు ఉపయోగపడే కంపానియన్ కేర్ సేవలు అన్నీ ఒకే వేదికపై లభిస్తాయని నిర్వాహకులు స్పష్టం చేశారు. వైద్య రంగానికి ఆధునిక సాంకేతికతను జోడించడం ద్వారా ఆరోగ్య సేవల వ్యవస్థను మరింత బలోపేతం చేసే ఈ ప్రయత్నంలో వైద్య వర్గాలు భాగస్వాములు కావాలని పిలుపునిచ్చారు.
తెలంగాణలో విద్యా, సాంస్కృతిక కేంద్రంగా పేరొందిన హనుమకొండ వేదికగా ప్రారంభమైన ఈ డిజిటల్ హెల్త్ సేవలు రానున్న రోజుల్లో గ్రామీణ, పట్టణ ప్రాంతాల ప్రజలకు ఎంతో ఉపయోగకరంగా మారనున్నాయి. అత్యవసర సమయాల్లో నాణ్యమైన వైద్య సేవలను వేగంగా పొందేందుకు ఈ ఆధునిక వేదిక దోహదపడుతుందని వైద్య నిపుణులు అభిప్రాయపడ్డారు.
Also Read: మోసపోయాం జానకి టైటిల్ ఆసక్తికరంగా ఉందన్న సందీప్ రెడ్డి వంగా.. చిత్రబృందానికి ప్రత్యేక శుభాకాంక్షలు!