కేంబ్రిడ్జ్ పాఠశాలలో ఘనంగా బాలల దినోత్సవం - ఉపాధ్యాయుల వేషధారణలో ఆకట్టుకున్న విద్యార్థులు

సూర్య - మానకొండూరు : మానకొండూరు మండల కేంద్రంలోని కేంబ్రిడ్జ్ ఆంగ్ల మాధ్యమ పాఠశాలలో శనివారం భారత తొలి ప్రధాని పండిట్ జవహర్‌లాల్ నెహ్రూ జయంతిని పురస్కరించుకొని బాలల దినోత్సవ వేడుకలను ఘనంగా నిర్వహించారు. ఈ సందర్భంగా పాఠశాల ప్రాంగణం చిన్నారుల కోలాహలంతో సందడిగా మారింది. ముందుగా పాఠశాల ప్రిన్సిపల్, కరెస్పాండెంట్ దుంపేటి అంజలి, శ్రీనివాస్‌లు ఉపాధ్యాయులతో కలిసి జవహర్‌లాల్ నెహ్రూ చిత్రపటానికి పూలమాలలు వేసి ఘనంగా నివాళులర్పించారు.ఈ వేడుకల్లో భాగంగా విద్యార్థులు ఉపాధ్యాయుల వేషధారణలో తరగతి గదుల్లోకి వెళ్లి తోటి విద్యార్థులకు స్వయంగా పాఠాలు బోధించి అందరినీ ఆకట్టుకున్నారు. అనంతరం నిర్వహించిన సభలో చిన్నారులు తాము ఉపాధ్యాయులుగా మారినప్పటి మధుర అనుభవాలను తోటివారితో పంచుకున్నారు. విద్యార్థులు ప్రదర్శించిన పలు సాంస్కృతిక కార్యక్రమాలు, నృత్యాలు ఆహుతులను ఎంతగానో అలరించాయి.ఈ సందర్భంగా పాఠశాల కరెస్పాండెంట్, ప్రిన్సిపల్ దుంపేటి అంజలి, శ్రీనివాస్ మాట్లాడుతూ... దేశ స్వాతంత్య్ర సంగ్రామంలో కీలక పాత్ర పోషించిన మహానేత నెహ్రూ అని కొనియాడారు. స్వతంత్ర భారతదేశానికి మొట్టమొదటి ప్రధానిగా, విదేశాంగ మంత్రిగా ఆయన చేసిన సేవలు చిరస్మరణీయమని గుర్తు చేశారు. చిన్నపిల్లలంటే నెహ్రూకు ఎంతో ఇష్టమని, అందుకే ఆయనను అందరూ ఆప్యాయంగా 'చాచా నెహ్రూ' అని పిలుచుకుంటారని విద్యార్థులకు వివరించారు. నేటి బాలలే రేపటి పౌరులని, విద్యార్థులు నెహ్రూ ఆశయాలను ఆదర్శంగా తీసుకొని ఉన్నత శిఖరాలకు చేరుకోవాలని ఆకాంక్షించారు. ఈ కార్యక్రమంలో ఉపాధ్యాయులు గీత, సువర్ణ, నర్మద, మంజుల, మౌనిక, సుధ, శ్రీమహి, కె.శ్రీనివాస్, విద్యార్థుల తల్లిదండ్రులు, చిన్నారులు పెద్ద సంఖ్యలో పాల్గొన్నారు.