ఒకే రౌటర్ లోపంతో అమెరికా విమానయానం అతలాకుతలం...

                                    9,000కి పైగా విమానాల రద్దుకు కారణమైన L3Harris అప్‌గ్రేడ్!

సూర్య ఏవియేషన్ & టెక్ డెస్క్ (వాషింగ్టన్): అమెరికా విమానయాన చరిత్రలో 2001 సెప్టెంబర్ 11 దాడుల తర్వాత ఎదురైన అత్యంత తీవ్రమైన అంతరాయానికి ఒకే ఒక్క నెట్‌వర్క్ రౌటర్ కారణమైందని అధికారులు వెల్లడించారు. ఫెడరల్ ఏవియేషన్ అడ్మినిస్ట్రేషన్  టెలికమ్యూనికేషన్స్ కాంట్రాక్టర్ అయిన 'ఎల్3హారిస్ టెక్నాలజీస్' చేపట్టిన సాధారణ నెట్‌వర్క్ అప్‌గ్రేడ్ పనుల సమయంలో తలెత్తిన సాంకేతిక లోపం దేశవ్యాప్త విమాన రాకపోకలను సుమారు ఐదు గంటల పాటు పూర్తిగా నిలిపివేసింది. ఈ పరిణామంతో శుక్రవారం ఒక్కరోజే దాదాపు 9,200 విమానాలు రద్దు కాగా, 7,500 విమానాలు ఆలస్యమయ్యాయి. శనివారం సైతం 6,150కి పైగా విమానాలు రద్దు కావడంతో లక్షలాది మంది ప్రయాణికులు తీవ్ర ఇబ్బందులు ఎదుర్కొన్నారు.

అసలేం జరిగింది? ఒకే రౌటర్ వ్యవస్థను ఎలా కుప్పకూల్చింది?:అమెరికా రవాణా శాఖ కార్యదర్శి సీన్ డఫీ  మరియు FAA చీఫ్ బ్రయాన్ బెడ్‌ఫోర్డ్ వెల్లడించిన వివరాల ప్రకారం, పాత రాగి కేబుళ్ల స్థానంలో ఫైబర్-ఆప్టిక్ కనెక్షన్లను ఏర్పాటు చేసే పనిని L3Harris సంస్థ నిర్వహిస్తోంది.

ఈ క్రమంలో ఒక మారుమూల కేంద్రంలో అమర్చిన కొత్త రౌటర్ నుంచి డేటా ఓవర్‌లోడ్  అయి, ఎయిర్ ట్రాఫిక్ కంట్రోల్ వ్యవస్థలోకి అసంగత డేటా ప్యాకెట్లు ప్రవహించాయి.

దీని ప్రభావంతో దేశంలోని 22 ప్రధాన ఎన్‌రూట్ సెంటర్లలో 17 కేంద్రాల కమ్యూనికేషన్ వ్యవస్థలపై తీవ్ర ప్రభావం పడింది. పైలట్లు, కంట్రోలర్ల మధ్య వాయిస్ కమ్యూనికేషన్‌లో అంతరాయం ఏర్పడటం, రాడార్ స్క్రీన్లు ఫ్లాష్ అవ్వడం వంటి ప్రమాదకర పరిస్థితులు తలెత్తడంతో ముందుజాగ్రత్త చర్యగా FAA దేశవ్యాప్తంగా 'గ్రౌండ్ స్టాప్'  విధించింది.

సైబర్ దాడి కాదని స్పష్టీకరణ & దర్యాప్తు:ఈ ఘటన జరిగిన వెంటనే వైట్‌హౌస్ 'సిట్యుయేషన్ రూమ్'లో అత్యవసర సమావేశం నిర్వహించి, ఇది ఏదైనా విదేశీ సైబర్ దాడి  లేదా ఆర్టిఫిషియల్ ఇంటెలిజెన్స్ లోపమా అనే కోణంలో దర్యాప్తు చేపట్టింది. అయితే, ఇందులో సైబర్ దాడి ప్రమేయం లేదని అధికారులు స్పష్టం చేశారు. L3Harris అమర్చిన రౌటర్ హార్డ్‌వేర్ లోపభూయిష్టంగా ఉందా లేక సిబ్బంది తప్పుగా ఇన్‌స్టాల్ చేశారా  అనే అంశంపై విచారణ కొనసాగుతోంది. సమస్యాత్మక కనెక్షన్‌ను తొలగించడంతో పాటు దేశవ్యాప్తంగా ఉన్న 60కి పైగా సారూప్య రౌటర్లలో ఆ ఫీచర్‌ను తాత్కాలికంగా నిలిపివేయడంతో వ్యవస్థ తిరిగి స్థిరపడింది.

విమానయాన సంస్థలపై భారీ ప్రభావం & 50 బిలియన్ డాలర్ల నిధుల డిమాండ్:ఈ అంతరాయం వల్ల డెల్టా, యునైటెడ్, అమెరికన్ ఎయిర్‌లైన్స్ తమ శనివారం షెడ్యూల్‌లో 25 శాతం విమానాలను, జెట్‌బ్లూ ఏకంగా 45 శాతం విమానాలను రద్దు చేయాల్సి వచ్చింది. విమానాలు, సిబ్బంది వేర్వేరు ప్రాంతాల్లో చిక్కుకుపోవడంతో ఆదివారం రాత్రి నాటికి గానీ సాధారణ స్థితి నెలకొనే అవకాశం లేదని తెలిపింది. మరోవైపు, 2001-2006 నాటి పాత రౌటర్లు, దశాబ్దాల నాటి కంప్యూటర్ వ్యవస్థలపై ఆధారపడుతున్నమౌలిక సదుపాయాల ఆధునీకరణ కోసం 50 బిలియన్ డాలర్ల నిధులు కేటాయించాలని రవాణా శాఖ కార్యదర్శి సీన్ డఫీ కాంగ్రెస్‌ను కోరారు. ఈ ఘటన నేపథ్యంలో L3Harris షేర్లు ట్రేడింగ్‌లో సుమారు 4 శాతం మేర పతనమయ్యాయి.