పల్లె పోరుకు తెరలేచింది.. మూడు రోజులు నామినేషన్ల పర్వం

ఎమ్మిగనూరు, సూర్య ప్రతినిధి, గ్రామ పంచాయతీ ఎన్నికల నిర్వహణకు సంబంధించి నేటి నుంచి నామినేషన్ల స్వీకరణ ప్రక్రియ ప్రారంభం కానుంది. దీంతో జిల్లాలో పల్లెపోరు రాజకీయ వాతావరణం వేడెక్కనుంది. సర్పంచ్, వార్డు సభ్యులుగా పోటీ చేయాలనుకునే ఆశావహులు నామినేషన్లు దాఖలు చేసేందుకు సిద్ధమవుతున్నారు. నవంబర్ 15 నుంచి 17వ తేదీ వరకు మూడు రోజుల పాటు నామినేషన్లను స్వీకరించనున్నారు.
కర్నూలు జిల్లాలో మొత్తం 26 మండలాల పరిధిలో 484 గ్రామ పంచాయతీలు, 5,100 వార్డులు ఉండగా, 12.50 లక్షలకు పైగా ఓటర్లు ఉన్నారు. జిల్లాలో గ్రామ పంచాయతీ ఎన్నికలను మూడు విడతల్లో నిర్వహించేందుకు ఎన్నికల ప్రణాళిక రూపొందించారు. ఇందులో భాగంగా మొదటి విడత ఎన్నికలకు సంబంధించిన ప్రక్రియ ఇప్పటికే ప్రారంభమైంది.
మొదటి విడతలో ఆదోని రెవెన్యూ డివిజన్ పరిధిలో ఆదోని-1, ఆదోని-2, హోలగుంద మండలాలు, పత్తికొండ రెవెన్యూ డివిజన్ పరిధిలో ఆలూరు, ఆస్పరి, చిప్పగిరి, దేవనకొండ, హాలహర్వి మండలాల్లో ఎన్నికలు జరగనున్నాయి. ఈ ఎనిమిది మండలాల్లో నవంబర్ 26న పోలింగ్ నిర్వహించనున్నారు.
ఎన్నికల షెడ్యూల్ ఇలా..
నవంబర్ 15–17: నామినేషన్ల స్వీకరణ (ఉదయం 10.30 నుంచి సాయంత్రం 5 గంటల వరకు). నవంబర్ 18: నామినేషన్ల పరిశీలన. నవంబర్ 19: తిరస్కరణకు గురైన నామినేషన్లపై అప్పీళ్ల దాఖలు. నవంబర్ 20: అప్పీళ్ల పరిష్కారం. నవంబర్ 21: మధ్యాహ్నం 3 గంటల వరకు నామినేషన్ల ఉపసంహరణ. నవంబర్ 26: ఉదయం 7 నుంచి మధ్యాహ్నం 1 గంట వరకు పోలింగ్.అదే రోజు మధ్యాహ్నం 2 గంటల నుంచి ఓట్ల లెక్కింపు, అనంతరం ఫలితాల ప్రకటన.నవంబర్ 27 అవసరమైతే రీపోలింగ్.
*A. R. శరత్ కుమార్, సూర్య ప్రతినిధి, ఎమ్మిగనూరు, కర్నూలు జిల్లా.*