కాలుష్య కోరల్లో ప్రజలు.. స్వచ్ఛమైన గాలి, నీరు ప్రజల హక్కు: ఈటల రాజేందర్‌
ఘట్కేసర్, మేజర్ న్యూస్: జవహర్‌నగర్‌ డంప్‌యార్డు కాలుష్య సమస్యకు శాశ్వత పరిష్కారం చూపాలని మల్కాజిగిరి ఎంపీ ఈటల రాజేందర్‌ డిమాండ్‌ చేశారు. పాదయాత్ర రెండో రోజు ఘట్కేసర్ మండల కేంద్రానికి చేరుకున్న ఆయనకు ప్రజలు ఘనస్వాగతం పలికారు. ఈ సందర్భంగా ఈటల రాజేందర్‌ మాట్లాడుతూ అత్యాధునిక సాంకేతిక పరిజ్ఞానాన్ని వినియోగించి కాలుష్య సమస్యకు శాశ్వత పరిష్కారం చూపాలని, ఘట్‌కేసర్‌లో ఫ్లైఓవర్‌ నిర్మాణాన్ని వెంటనే చేపట్టాలని డిమాండ్‌ చేశారు. స్థానిక పరిశ్రమల వ్యర్థాలు, డంప్‌యార్డు నుంచి వెలువడుతున్న మురుగు కారణంగా ఎదురవుతున్న ఇబ్బందులను బాధితులు ఆయన దృష్టికి తీసుకువచ్చారు.ప్రముఖ పర్యావరణవేత్త పురుషోత్తం రెడ్డి మాట్లాడుతూ జవహర్‌నగర్‌ డంప్‌యార్డును తొలగించాలంటూ గతంలోనే జాతీయ హరిత ట్రిబ్యునల్‌ ఆదేశాలు ఇచ్చిందని, వాటిని అమలు చేయాలని కోరారు. “గాలి పీల్చేది బతకడానికి.. చావడానికి కాదు. కాలుష్యంతో గాలి, నీరు విషతుల్యమవుతున్నాయి. స్వచ్ఛమైన గాలి, నీరు ప్రజల హక్కు” అని పేర్కొన్నారు. కాలుష్యంతో ప్రజలు ఎదుర్కొంటున్న సమస్యలను ప్రభుత్వం గుర్తించి, ప్రజారోగ్యాన్ని కాపాడేలా తక్షణ చర్యలు చేపట్టాలని ఆయన కోరారు.ఈ కార్యక్రమంలో అధ్యక్షుడు బుద్ధి శ్రీనివాస్, మేడ్చల్‌ నియోజకవర్గ ఇన్‌చార్జి ఏనుగు సుదర్శన్‌ రెడ్డి, ఘట్కేసర్ డివిజన్‌ బీజేపీ అధ్యక్షుడు కొమ్మిడి మైపాల్‌ రెడ్డి, ప్రధాన కార్యదర్శి చెల్లక శ్రీధర్‌తో పాటు పలువురు నాయకులు, కార్మికులు, విద్యార్థులు, మహిళలు పాల్గొన్నారు.
