మెదక్ జిల్లా మొత్తం కరువు ప్రాంతంగా ప్రకటించాలి.
అల్లాదుర్గం.. మెదక్ జిల్లాలోని మొత్తం అన్ని మండలాలను కరువు మండలాలుగా ప్రకటించాలని సింగూరు జలాల సాధన కమిటీ అధ్యక్షులు బ్రహ్మం ప్రభుత్వానికి కోరారు. ఈ సందర్భంగా విలేకరులతో మాట్లాడుతూ రాష్ట్ర ప్రభుత్వం కరువు మండలాలను ప్రకటించిందని ,కానీ మెదక్ జిల్లాలోని ఒక్క మండలాన్ని కరువు ప్రాంతంగా ప్రకటించడం అన్యాయమన్నారు. మెదక్ జిల్లా లోని రైతులు వ్యవసాయంపై ఆధారపడి జీవనం సాగిస్తున్నారని, ఏలినో ప్రభావంతో ఈ ప్రాంతంలో వర్షాలు సరిగా కురువక రైతులు అల్లాడుతున్నారని ఆవేదన వ్యక్తం చేశారు. సంగారెడ్డి జిల్లాలోని అన్ని మండలాలకు న్యాయం చేసి మెదక్ జిల్లా లోని రైతాంగానికి అన్యాయం చేయడం ఏమిటని ప్రశ్నించారు. ఈ ప్రాంతంలోని సింగూరు ప్రాజెక్ట్ పూర్తిగా డెత్ స్టోరేజ్ లో ఉందని, ఈ సీజన్లో వ్యవసాయానికి నీరు ఇచ్చే ఆస్కారం లేదని, అలాంటిది జిల్లాను ఏ ప్రాతిపదికన కరువు ప్రాంతంగా ఎందుకు ఎంపిక చేయలేదో రైతులకు వివరించాలన్నారు. ఈ సంవత్సరం వర్షాలు సమృద్ధిగా కురువక జిల్లాలో పూర్తిగా నీటిమట్టం తగ్గి బోర్ మోటార్ లు ఎండిపోయే పరిస్థితి నెలకొని ఉందని , ప్రభుత్వం వెంటనే మెదక్ జిల్లాలోని అన్ని మండలాలలో క్షేత్రస్థాయిలో వాస్తవ పరిస్థితులు తెలుసుకొని జిల్లాలోని అన్ని మండలాలను కరువు మండలాలుగా ప్రకటించి ఈ ప్రాంత రైతులకు న్యాయం చేయాలని కోరారు. లేనియెడల రైతుల పెద్ద ఎత్తున ఆందోళన కార్యక్రమాలు చేపట్టడం ఖాయమన్నారు.
