జీఓ 49ను రద్దు చేయాలి...ఆదివాసీల హక్కులను కాపాడాలి.. తుడుం దెబ్బ డిమాండ్

సూర్య, పెంచికల్ పేట్ : కొమురం భీం ఆసిఫాబాద్ జిల్లాలోని 339 ఆదివాసీ గ్రామాల ప్రజల భూమి హక్కులు, జీవనోపాధి, సంస్కృతి, సంప్రదాయాలకు భంగం కలిగించే జీఓ నం.49ను కేంద్ర, రాష్ట్ర ప్రభుత్వాలు వెంటనే రద్దు చేయాలని ఆదివాసీ హక్కుల పోరాట సమితి తుడుం దెబ్బ రాష్ట్ర కమిటీ డిమాండ్ చేసింది. ఈ మేరకు రాష్ట్ర అధ్యక్షుడు గోడం గణేష్ మాట్లాడుతూ.. తరతరాలుగా అడవులనే నమ్ముకొని జీవిస్తున్న ఆదివాసీలు పోడు వ్యవసాయం ద్వారా కుటుంబాలను పోషించుకుంటూ తమ సంస్కృతి, సంప్రదాయాలను కాపాడుకుంటున్నారని తెలిపారు.టైగర్‌ జోన్లు, కన్జర్వేషన్‌ కారిడార్లు, బఫర్‌, కోర్‌ ఏరియాల పేరుతో ప్రభుత్వాలు మంజూరు చేసిన ఇళ్ల నిర్మాణాలను అటవీ అధికారులు అడ్డుకోవడం సరికాదన్నారు. తెలంగాణవ్యాప్తంగా పోడు సాగు చేస్తున్న ఎనిమిది లక్షల మంది అర్హులైన ఆదివాసీ రైతులకు అటవీ హక్కుల చట్టం–2006 ప్రకారం సర్వే నిర్వహించి హక్కు పత్రాలు మంజూరు చేయాలని కోరారు.కమ్మర్గాం, మొర్లిగూడెం, జిల్లాడ, నందిగామ, గుండెపల్లి, జైహింద్‌పూర్‌, సోమిని, మొగవెల్లి, కొయ్యపెల్లి, రావణ్‌పెల్లి, దిగ్గిడ గూడెం తదితర ఆదివాసీ గ్రామాలకు తక్షణమే రహదారులు మంజూరు చేయాలని, అటవీ అధికారుల వేధింపులు, దౌర్జన్యాల నుంచి ఆదివాసీలను రక్షించాలని ప్రభుత్వాలను డిమాండ్ చేశారు.ఈ కార్యక్రమంలో తుడుం దెబ్బ రాష్ట్ర ఉపాధ్యక్షుడు సోయం చిన్నయ్య, రాష్ట్ర కార్యదర్శులు గంట సత్యం, అర్కా శేషారావు, జిల్లా ఉపాధ్యక్షుడు తలండి మధుకర్‌, మురళి గూడ సర్పంచ్ పోర్తేటి వెంకటేష్ మరియు మాడవి మల్లేష్ తదితరులు పాల్గొన్నారు.