జైత్వారం అంగన్వాడీ కేంద్రంలో ఆరోగ్య అవగాహన కార్యక్రమం

జైత్వారం అంగన్వాడీ కేంద్రంలో ఆరోగ్య అవగాహన కార్యక్రమం

** పిల్లల ఆరోగ్యం పట్ల ప్రత్యేక శ్రద్ధ వహించాలి

** సర్పంచ్ బైరు కొండల్ రెడ్డి

కందుకూరు, అక్టోబర్ 24: 
కందుకూరు మండలం జైత్వారం గ్రామంలోని అంగన్‌వాడీ కేంద్రంలో వీఎచ్‌ఎం ( విహెచ్ఎం ) సమావేశం నిర్వహించారు. ఈ సమావేశానికి గ్రామ సర్పంచ్ బైరు కొండల్ రెడ్డి ముఖ్య అతిథిగా హాజరయ్యారు. ప్రాథమిక పాఠశాల ప్రధానోపాధ్యాయుడు రమేష్ రెడ్డి, సూపర్‌వైజర్ శ్యామల, సిస్టర్ రజని, అంగన్‌వాడీ టీచర్ సుమతి, ఆశా కార్యకర్తలు, గ్రామ పెద్దలు, తల్లులు పాల్గొన్నారు.
ఈ సందర్భంగా 0–5 సంవత్సరాల పిల్లలు, గర్భిణులు, బాలింతలకు నిర్ణీత షెడ్యూల్ ప్రకారం టీకాలు, వ్యాక్సిన్లు వేయించుకోవాలని సూచించారు. ప్రతి నెల మొదటి శనివారం పిల్లలకు, గర్భిణులు, బాలింతలకు ఇమ్యునైజేషన్ కార్యక్రమం నిర్వహించడంతో పాటు, నాలుగో శనివారం గర్భిణులకు అవసరమైన టీటీ ఇంజెక్షన్లు, పిల్లలకు టీకాలు అందించే కార్యక్రమాలపై అవగాహన కల్పించారు.
ఈ సందర్భంగా సర్పంచ్ బైరు కొండల్ రెడ్డి మాట్లాడుతూ...తల్లులు తమ పిల్లల ఆరోగ్యం పట్ల ప్రత్యేక శ్రద్ధ వహించాలని, నిర్ణీత సమయంలో టీకాలు వేయించాలని సూచించారు. గర్భిణులు, బాలింతలు ఆరోగ్య నియమాలు పాటిస్తూ, పిల్లల సంరక్షణపై తగిన జాగ్రత్తలు తీసుకోవాలని తెలిపారు.
ఈ కార్యక్రమంలో గ్రామ పెద్దలు, అంగన్‌వాడీ సిబ్బంది, ఆశా కార్యకర్తలు, తల్లులు పాల్గొన్నారు.