భూముల రీ-సర్వే పకడ్బందీగా నిర్వహించాలి

సిద్దిపేట,  : రాష్ట్రవ్యాప్తంగా భూముల రీ-సర్వే ప్రక్రియను అత్యంత పకడ్బందీగా నిర్వహించాలని రాష్ట్ర రెవెన్యూ శాఖ ప్రత్యేక ప్రధాన కార్యదర్శి డి.ఎస్. లోకేష్ కుమార్ అన్ని జిల్లాల కలెక్టర్లను ఆదేశించారు. శనివారం హైదరాబాద్ నుంచి భూభారతి రీ-సర్వే కార్యక్రమంపై అన్ని జిల్లాల కలెక్టర్లతో వీడియో కాన్ఫరెన్స్ నిర్వహించి పురోగతిని సమీక్షించారు.ఈ సందర్భంగా ఆయన మాట్లాడుతూ.. భూభారతి రీ-సర్వే పురోగతి, క్షేత్రస్థాయిలో చేపడుతున్న పనులు, భూ రికార్డుల పరిశీలన, సర్వే ప్రక్రియలో ఎదురవుతున్న సమస్యలపై సమీక్షించినట్లు తెలిపారు. రీ-సర్వేను సమన్వయంతో ముందుకు తీసుకెళ్లేందుకు అవసరమైన చర్యలు చేపట్టాలని కలెక్టర్లకు సూచించారు.

భూ రికార్డుల్లో పారదర్శకతకు ప్రాధాన్యం

భూభారతి రీ-సర్వే పనులను నిబంధనలకు అనుగుణంగా నిర్వహించాలని, భూ రికార్డుల విషయంలో పారదర్శకతకు పెద్దపీట వేయాలని లోకేష్ కుమార్ స్పష్టం చేశారు. సంబంధిత శాఖల అధికారులు పరస్పర సమన్వయంతో పనిచేస్తూ, సర్వే సమయంలో ఎదురయ్యే సమస్యలను ఎప్పటికప్పుడు పరిష్కరించాలని సూచించారు.గ్రామాల్లో నివసించని భూయజమానులను సంప్రదించడంలో ఇబ్బందులు ఎదురయ్యే అవకాశం ఉన్నందున వ్యవసాయ శాఖ అధికారుల సహకారం తీసుకోవాలని తెలిపారు. ఫార్మర్ రిజిస్ట్రీ, రైతు భరోసా తదితర కార్యక్రమాల ద్వారా వ్యవసాయ శాఖ అధికారులు రైతులతో నిరంతరం సంప్రదింపులు జరుపుతున్నందున, వారి సహకారంతో గ్రామాల్లో నివసించని భూయజమానులను గుర్తించి సంప్రదించాలని సూచించారు. అనంతరం రీ-సర్వే ప్రక్రియను వేగవంతంగా పూర్తి చేయాలని ఆదేశించారు.

జిల్లాలో 30 గ్రామాల్లో రీ-సర్వే

వీడియో కాన్ఫరెన్స్‌లో సిద్దిపేట జిల్లా కలెక్టర్ కె. హైమావతి మాట్లాడుతూ.. జిల్లాలోని వివిధ మండలాల్లో 30 గ్రామాల్లో రీ-సర్వే ప్రక్రియ సజావుగా కొనసాగుతోందని తెలిపారు. ప్రామాణిక నిర్వహణ విధానం (ఎస్‌ఓపీ) ప్రకారం పనులు చేపడుతున్నామని, ప్రస్తుతం ఎలాంటి ఇబ్బందులు లేవని వివరించారు.

గ్రామాల్లో నివసించని భూయజమానులను సంప్రదించేందుకు కొంత సమయం అవసరమవుతోందని కలెక్టర్ పేర్కొన్నారు. రాష్ట్రస్థాయి అధికారులు సూచించిన విధంగా సంబంధిత శాఖల సమన్వయంతో రీ-సర్వే ప్రక్రియను పూర్తి చేస్తామని తెలిపారు.ఈ వీడియో కాన్ఫరెన్స్‌లో సమీకృత జిల్లా కార్యాలయాల సముదాయం నుంచి జిల్లా కలెక్టర్ కె. హైమావతి, ఏడీ సర్వే అండ్ ల్యాండ్ సుదర్శన్ తదితరులు పాల్గొన్నారు.