telangana
మోమిన్‌పేట్ రైతు వేదికలో ఎల్‌నినో ప్రభావంపై సమీక్ష.. వీక్షించిన రైతులు
మోమిన్‌పేట్, మేజర్ న్యూస్:ఎల్‌నినో ప్రభావంతో మారనున్న వాతావరణ పరిస్థితులు, వ్యవసాయ రంగంపై వాటి ప్రభావం, రైతులు తీసుకోవాల్సిన ముందస్తు జాగ్రత్తలపై అవగాహన కల్పించే దిశగా తెలంగాణ రాష్ట్ర సచివాలయం నుంచి నిర్వహించిన సమీక్ష సమావేశాన్ని మోమిన్‌పేట్ రైతు వేదికలో రైతులు వీక్షించారు. తెలంగాణ ప్రభుత్వ ప్రధాన కార్యదర్శి సంజయ్ జాజు ఆధ్వర్యంలో నిర్వహించిన ఈ సమావేశంలో ఎల్‌నినో ప్రభావ పరిస్థితులు, వర్షపాతంలో మార్పులు, పంటల సాగుపై వాటి ప్రభావం తదితర అంశాలపై చర్చించారు.వాతావరణ పరిస్థితుల్లో మార్పుల నేపథ్యంలో రైతులు ముందస్తు వ్యవసాయ ప్రణాళికలు రూపొందించుకోవడం, పరిస్థితులకు అనుగుణంగా పంటల సాగుపై నిర్ణయాలు తీసుకోవడం, పంటలను కాపాడుకునేందుకు అవసరమైన జాగ్రత్తలు పాటించడం వంటి అంశాలపై సమావేశంలో దృష్టి సారించారు. వర్షపాతంలో మార్పులు చోటుచేసుకునే అవకాశాలను దృష్టిలో ఉంచుకొని వ్యవసాయ శాఖ సూచనలు పాటించాలని, వాతావరణ పరిస్థితులకు అనుగుణంగా సాగు పద్ధతులను అనుసరించాలని సూచించారు.వాతావరణ మార్పులపై ఎప్పటికప్పుడు అవగాహన కలిగి ఉండటం ద్వారా పంటల సాగులో ఎదురయ్యే సమస్యలను ముందుగానే గుర్తించి తగిన చర్యలు తీసుకునే అవకాశం ఉంటుందని ఈ కార్యక్రమం ప్రాధాన్యతను సంతరించుకుంది. ప్రభుత్వ స్థాయిలో నిర్వహించే సమీక్ష సమావేశాల ద్వారా అందే సమాచారాన్ని రైతులకు చేరవేయడం వ్యవసాయ రంగానికి ప్రయోజనకరంగా ఉంటుందని భావిస్తున్నారు.
మోమిన్‌పేట్ రైతు వేదికలో నిర్వహించిన ఈ వీక్షణ కార్యక్రమంలో మర్పల్లి మార్కెట్ కమిటీ చైర్మన్ వై. మహేందర్ రెడ్డి, కాంగ్రెస్ పార్టీ మండల అధ్యక్షుడు శంకర్ యాదవ్, సర్పంచుల సంఘం మండల అధ్యక్షుడు కోస్గి సురేందర్, మండల కాంగ్రెస్ నాయకులు, కార్యకర్తలు, రైతులు తదితరులు పాల్గొన్నారు.
రిపోర్టర్: వడ్ల మాణిక్యం చారి, మోమిన్ పేట్, వికారాబాద్ జిల్లా.
