మల్లారెడ్డిపల్లిలో పశువుల చోరీ

నవాబుపేట సూర్య న్యూస్:మండలంలోని మల్లారెడ్డిపల్లి గ్రామ శివారులో పశువుల చోరీ ఘటన కలకలం రేపింది.శనివారం తెల్లవారుజామున గుర్తుతెలియని వ్యక్తులు ఒక ఆవు,రెండు గేదెలను అపహరించడంతో పాటు,పశువుల షెడ్డులో ఉన్న మిగతా పశువులకు ఇంజక్షన్లు ఇవ్వడంతో వాటి పరిస్థితి విషమంగా మారినట్లు సమాచారం.ఎస్సై నరేందర్ తెలిపిన వివరాల ప్రకారం..మల్లారెడ్డిపల్లి గ్రామానికి చెందిన దొన్లపల్లి రామచంద్రయ్య,దొన్లపల్లి రాజమల్లయ్య తమ పశువులను గ్రామ శివారులోని పొలంలో ఉన్న షెడ్డులో కట్టేసేవారు.శనివారం తెల్లవారుజామున రామచంద్రయ్య వరి పొలానికి నీళ్లు పెడుతుండగా పశువుల షెడ్డు వద్ద కొందరు గుర్తుతెలియని వ్యక్తులు ఉండటాన్ని గమనించాడు.దీంతో వారి వద్దకు వెళ్లేలోపే ఆ వ్యక్తులు రెండు కార్లలో పరారయ్యారు.రామచంద్రయ్య వారిని కారూరు గ్రామ శివారు వరకు వెంబడించినప్పటికీ పట్టుకోలేకపోయాడు.అనంతరం పశువుల షెడ్డుకు తిరిగి వచ్చి చూడగా ఒక ఆవు,రెండు గేదెలు కనిపించలేదు.అంతేకాకుండా షెడ్డులో ఉన్న మిగతా పశువులకు దొంగలు ఇంజక్షన్లు ఇవ్వడంతో వాటి పరిస్థితి విషమంగా మారినట్లు తెలిసింది.దీంతో బాధితుడు రామచంద్రయ్య పోలీసులకు ఫిర్యాదు చేశాడు.బాధితుడి ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్సై నరేందర్ తెలిపారు.