ఎన్.హెచ్.ఏం ఉద్యోగుల 12వ రోజు రిలే దీక్షలకు రిటైర్డు ఉద్యోగ సంఘం నాయకుల మద్దతు

*నారాయణపేట, సూర్యన్యూస్* :  న్యాయమైన డిమాండ్ల పరిష్కారం కోసం టీజీ ఎన్.హెచ్.ఏం జేఏసి ఆధ్వర్యంలో చేపట్టిన రిలే దీక్షలు 12వ రోజుకు చేరుకున్నాయి. నారాయణపేట జిల్లా కేంద్రంలోని స్వామి వివేకానంద పార్క్ దగ్గర శనివారం జరిగిన ఎన్.హెచ్.ఏం ఉద్యోగుల నిరసన కార్యక్రమానికి జిల్లా, పట్టణ రిటైర్డు ఉద్యోగుల సంఘం నాయకులు మద్దతు తెలిపారు. ఈ సందర్భంగా రిటైర్డు ఉద్యోగుల సంఘం జిల్లా ప్రధాన కార్యదర్శి వకీల్ సంతోష్ కుమార్ లు మాట్లాడుతూ ఎన్నో ఏళ్లుగా ప్రజలకు వైద్య సేవలందిస్తున్న ఎన్.హెచ్.ఏం ఉద్యోగులను ప్రభుత్వం రెగ్యులరైజ్ చేయాలని డిమాండ్ చేశారు. ఉద్యోగ, ఆరోగ్య భద్రత కల్పించాలన్నారు. ఎన్నో ప్రభుత్వాలు మారుతున్నా ఎన్.హెచ్.ఏం ఉద్యోగుల జీవితాల్లో మాత్రం ఆశించిన మార్పు రావడం లేదని ఆవేదన వ్యక్తం చేశారు. ప్రజల ఆరోగ్య పరిరక్షణ కోసం అహర్నిశలు శ్రమిస్తున్న ఉద్యోగులు నేటికి కాంట్రాక్ట్, ఔట్‌సోర్సింగ్ విధానాల్లో అభద్రత మధ్య పనిచేయాల్సి వస్తోందన్నారు. మహిళా ఉద్యోగులకు 180 రోజుల వేతనంతో కూడిన ప్రసూతి సెలవులు తప్పని సరిగా అమలు చేయాలని డిమాండ్ చేశారు. ఎన్.హెచ్.ఏం ఉద్యోగుల న్యాయమైన డిమాండ్లను తెలంగాణ రాష్ట్ర ప్రభుత్వం సానుకూలంగా పరిశీలించి పరిష్కరించాలని డిమాండ్ చేశారు. సంఘీభావం తెలిపిన వారిలో రిటైర్డ్ ఉద్యోగుల సంఘం నాయకులు మనోహర్, తమ్మలి సత్యనారాయణ, భరత్, కే.సత్యనారాయణ, కృష్ణయ్యలు ఉన్నారు. ఈ కార్యక్రమంలో యూనియన్ గౌరవ అధ్యక్షులు బిక్షపతి, అధ్యక్షులు ప్రసాద్, ప్రధాన కార్యదర్శి వెంకటరమణ, కోశాధికారి రాఘవేందర్, ఎన్.హెచ్.ఎం యూనియన్ సభ్యులు మోనేష్ చారి, నరసింహరావు సగరి, తిరుపతి, అర్చన, రామస్వామి, మునీర్, హబీబ్, సోహెల్, వినోద్, నరేందర్, విజయ్, కిరీటి, నవశ్రీ, విరోజ, చందన, అనురాధ, సౌందర్య, పుష్ప, సావిత్రమ్మ, దేవిక, సుజాత, శ్వేతశ్రీ, అజారుద్దీన్,  స్నేహలత, మమత పాల్గొన్నారు.
-- రాజేష్ కుమార్, సూర్య రిపోర్టర్, నారాయణపేట.