telangana
దోమ ప్రజావాణికి నాలుగు దరఖాస్తులే
దోమ, మేజర్ న్యూస్: ప్రజా సమస్యల పరిష్కారమే లక్ష్యంగా నిర్వహిస్తున్న ప్రజావాణి కార్యక్రమానికి ప్రజల నుంచి స్పందన కరువైంది. సోమవారం దోమ మండల పరిషత్ కార్యాలయంలో నిర్వహించిన ప్రజావాణికి వివిధ గ్రామాల నుంచి వచ్చిన అర్జీదారులు కేవలం నాలుగు దరఖాస్తులు మాత్రమే సమర్పించారు. దీంతో ప్రజావాణి కార్యక్రమం నామమాత్రంగా సాగిందనే విమర్శలు వ్యక్తమవుతున్నాయి.మండలంలోని పలు గ్రామాల్లో ప్రజలు వివిధ సమస్యలతో ఇబ్బందులు పడుతున్నప్పటికీ, వాటి పరిష్కారం కోసం నిర్వహించే ప్రజావాణికి ఆశించిన స్థాయిలో స్పందన లేకపోవడంపై చర్చ జరుగుతోంది. గ్రామాల్లో కార్యక్రమంపై ముందస్తు ప్రచారం నిర్వహించకపోవడం, గతంలో సమర్పించిన అర్జీల పరిష్కారంలో జాప్యం జరుగుతుండటమే ప్రజల నిరాసక్తతకు కారణమని పలువురు అభిప్రాయపడుతున్నారు.ప్రజలు తమ సమస్యల పరిష్కారం కోసం ప్రభుత్వ కార్యాలయాల చుట్టూ తిరగాల్సి వస్తోందని, ప్రజావాణిలో ఇచ్చిన అర్జీలపై సకాలంలో చర్యలు తీసుకోకపోతే ఈ కార్యక్రమంపై నమ్మకం తగ్గే అవకాశం ఉందని స్థానికులు పేర్కొంటున్నారు. ప్రజావాణి నిర్వహణపై అధికారులు ప్రత్యేక దృష్టి సారించి, గ్రామస్థాయిలో విస్తృత ప్రచారం కల్పించాలని కోరుతున్నారు. గతంలో వచ్చిన దరఖాస్తుల పురోగతిని సమీక్షించడంతోపాటు, కార్యక్రమానికి హాజరుకాని అధికారుల విషయంలో ఉన్నతాధికారులు పరిశీలించి తగిన చర్యలు తీసుకోవాలని మండల ప్రజలు కోరుతున్నారు.
