ఆగిరిపల్లిలో వైఎస్సార్‌సీపీ ఎంపీటీసీ అభ్యర్థులకు బీ-ఫారాలు అందజేత గ్రామాల అభివృద్ధికి సహకరిస్తా: మాజీ ఎమ్మెల్యే ఎం.వి. ప్రతాప్ అప్పారావు
ఆగిరిపల్లి, మేజర్ న్యూస్: ఆగిరిపల్లి మండలంలో వైఎస్సార్ కాంగ్రెస్ పార్టీకి చెందిన 18 మంది ఎంపీటీసీ అభ్యర్థులకు నూజివీడు నియోజకవర్గ మాజీ శాసనసభ్యులు ఎం.వి. ప్రతాప్ అప్పారావు పార్టీ బీ-ఫారాలను అందజేశారు. ఈ సందర్భంగా అభ్యర్థులందరూ అధిక మెజార్టీతో విజయం సాధించి, ఆగిరిపల్లి మండల ఎంపీపీ, జెడ్పీటీసీ స్థానాలను కైవసం చేసుకునే దిశగా కృషి చేయాలని ఆయన సూచించారు.
మోసపూరిత హామీలతో అధికారంలోకి వచ్చిన కూటమి ప్రభుత్వానికి ప్రజలు తమ ఓటు ద్వారా తగిన గుణపాఠం చెప్పేందుకు సిద్ధంగా ఉన్నారని మాజీ ఎమ్మెల్యే ఎం.వి. ప్రతాప్ అప్పారావు అన్నారు. ప్రస్తుత కూటమి ప్రభుత్వం మరో రెండేళ్లే కొనసాగుతుందని, 2029లో వైఎస్ జగన్‌మోహన్ రెడ్డి నాయకత్వంలో వైఎస్సార్ కాంగ్రెస్ పార్టీ ప్రభుత్వం మళ్లీ అధికారంలోకి వస్తుందని ఆయన ధీమా వ్యక్తం చేశారు.ప్రస్తుత రాజకీయ పరిస్థితుల్లో పార్టీ అభ్యర్థులు ప్రజలకు అందుబాటులో ఉంటూ, వారి సమస్యల పరిష్కారానికి కృషి చేయాలని సూచించారు. ప్రజాప్రతినిధులుగా ఎన్నికై మూడు సంవత్సరాల పాటు ప్రజలకు సేవ చేసే అవకాశం ఉంటుందని పేర్కొంటూ, ప్రతి గ్రామ అభివృద్ధికి తన వంతు సహకారం అందిస్తానని అభ్యర్థులకు భరోసా ఇచ్చారు.
మండలంలోని అన్ని స్థానాల్లో పార్టీ అభ్యర్థులు విజయం సాధించేలా నాయకులు, కార్యకర్తలు సమన్వయంతో పనిచేయాలని ఆయన పిలుపునిచ్చారు.
