స్థానిక సంస్థల ఎన్నికల్లో ధన ప్రవాహం అరికట్టాలి

నేటి దినపత్రిక సూర్య బ్యూరో రాజమహేంద్రవరం

స్థానిక సంస్థల ఎన్నికలు స్వేచ్ఛగా, నిష్పక్షపాతంగా నిర్వహించేందుకు ఎన్నికల్లో ధన ప్రభావం, ప్రలోభాల పంపిణీని అరికట్టాలని డా. బి.ఆర్. అంబేద్కర్ కోనసీమ జిల్లా ఎన్నికల వ్యయ పరిశీలకులు  శివకుమార్ గంగాల్, IFS ఆదేశించారు.

జిల్లా ఎన్నికల వ్యయ పరిశీలకులు మాట్లాడుతూ

ఎన్నికల నియమావళిని కచ్చితంగా అమలు చేస్తూ, అభ్యర్థులు చేసే ఎన్నికల ఖర్చులపై నిరంతర పర్యవేక్షణ చేపట్టాలని ఆయన సూచించారు. ఫ్లయింగ్ స్క్వాడ్‌లు, స్టాటిక్ సర్వైలెన్స్ బృందాలు, ఇతర ఎన్నికల వ్యయ పర్యవేక్షణ బృందాలు పరస్పర సమన్వయంతో పనిచేయాలని ఆదేశించారు.

అలాగే, ఎన్నికల్లో పోటీ చేసే అభ్యర్థులకు ఎన్నికల వ్యయ పరిమితులు, పాటించాల్సిన నిబంధనలపై అవగాహన కల్పించాలని తెలిపారు. అభ్యర్థులు నిర్ణీత ప్రొఫార్మాల్లో ఎన్నికల వ్యయ వివరాలను సమర్పించేలా చర్యలు తీసుకోవాలని సూచించారు.

ఈ కార్యక్రమంలో జిల్లా ఆడిట్ అధికారి, జిల్లా ఎన్నికల వ్యయ పర్యవేక్షణ అధికారి శ్రీ ఏ.వి.వి. సత్యనారాయణ, సీనియర్ ఆడిటర్లు శ్రీ సి.హెచ్. మురళీకృష్ణ, శ్రీ ఆర్.భీమేశ్వరరావు, సహాయ ఎన్నికల వ్యయ పరిశీలకులు పాల్గొన్నారు.

అభ్యర్థుల ఎన్నికల వ్యయ పరిమితులు

పదవి / వర్గం| ఖర్చు పరిమితి (రూ. లక్షల్లో)

జనాభా 10,000 లేదా అంతకంటే ఎక్కువ ఉన్న గ్రామ పంచాయతీ సర్పంచ్| 4.00

జనాభా 10,000 కంటే తక్కువ ఉన్న గ్రామ పంచాయతీ సర్పంచ్| 2.50

జనాభా 10,000 లేదా అంతకంటే ఎక్కువ ఉన్న గ్రామ పంచాయతీ వార్డు సభ్యుడు| 1.00

జనాభా 10,000 కంటే తక్కువ ఉన్న గ్రామ పంచాయతీ వార్డు సభ్యుడు| 0.60

జెడ్పీటీసీ అభ్యర్థి| 8.00

ఎంపీటీసీ అభ్యర్థి| 4.00

మున్సిపల్ చైర్‌పర్సన్| 20.00

మున్సిపల్ కౌన్సిలర్| 1.50

నగర పంచాయతీ చైర్‌పర్సన్| 10.00

నగర పంచాయతీ కౌన్సిలర్| 5.00

ఎన్నికలు పారదర్శకంగా, నిష్పక్షపాతంగా జరిగేలా ఎన్నికల వ్యయ నియంత్రణపై సంబంధిత అధికారులు నిరంతరం నిఘా కొనసాగించాలని సూచించారు