దూసుకు వస్తున్న ఆర్నాబ్ తుఫాన్.... నేడు, రేపు విద్యాసంస్థలకు సెలవులు ...

విశాఖపట్నం, మేజర్ న్యూస్ : ఆర్నాబ్ తుఫాను తీవ్రత మంగళవారం ఉదయం నుండి కోస్తాంధ్ర దిశగా అధికంగా ఉంటుందని విశాఖ వాతావరణ శాఖ అధికారులు తెలియజేశారు. సాయంత్రానికి అతి తీవ్ర తుఫానుగా మారనుందని తెలిపారు. దీని ప్రభావంతో బలమైన పెనుగాలులు వీస్తాయని, శ్రీకాకుళం జిల్లా నుంచి బాపట్ల జిల్లా వరకు తీర ప్రాంతం తీవ్ర అలజడిగా ఉంటుందని తెలియజేశారు. కాకినాడ నుంచి యానం మధ్యలో తీరం దాటే అవకాశం ఉన్నట్లు తెలుస్తుందన్నారు.'అర్నాబ్' తుఫాను విశాఖపట్నానికి తూర్పు-ఆగ్నేయంగా సుమారు 600 కిలోమీటర్ల దూరంలో మధ్య బంగాళాఖాతంలో కేంద్రీకృతమై ఉంది. గత ఆరు గంటలుగా ఇది పశ్చిమ-నైరుతి దిశగా కదులుతూ బలపడి తీవ్ర తుఫానుగా మారింది. ఈ తుఫాను పరిస్థితులు అనుకూలంగా ఉండటం వల్ల రాబోయే 12 నుండి 24 గంటల్లో అత్యంత వేగంగా బలపడి, రేపటికల్లా అతి తీవ్ర తుఫానుగా  మారే అవకాశం ఉందని వాతావరణ శాఖ అధికారులు తెలియజేశారు. అక్టోబర్ 28 మధ్యాహ్నం కు  ఉత్తర కోస్తా ఆంధ్రప్రదేశ్ మీదుగా నరసాపురం - తుని మధ్య ఇది అతి తీవ్ర తుఫానుగా తీరం దాటే అవకాశం ఉందన్నారు . తీరం దాటే సమయంలో గాలుల వేగం గంటకు 100 - 120 కిలోమీటర్ల వరకు ఉండవచ్చునని,  వాతావరణ శాఖ  తాజా హెచ్చరికల ప్రకారం  తీవ్రమైన గాలులు  గంటకు 115-125 కి.మీ, గరిష్టంగా 140 కి.మీ వేగంతో భయంకరమైన ఈదురు గాలులు వీస్తాయన్నారు.  భారీ వర్షాలు: అక్టోబర్ 27, 28 తేదీల్లో అత్యంత భారీ వర్షాల వల్ల లోతట్టు ప్రాంతాలు జలమయం అవుతాయన్నారు.  సముద్రపు అలలు 1.0 నుంచి 1.5 మీటర్ల ఎత్తు వరకు ఎగసిపడి తీర ప్రాంతాలను ముంచెత్తే ప్రమాదం ఉందన్నారు. మత్స్యకారులు  అక్టోబర్ 29 వరకు ఎవరూ బంగాళాఖాతంలోకి వేటకు వెళ్లరాదని అధికారులు హెచ్చరికలు జారీ చేశారు.

కోస్తా,ఉత్తరాంధ్ర జిల్లాల్లో పాఠశాలలకు సెలవులు.
 
 బంగాళాఖాతంలో ఏర్పడిన 'అర్నబ్' తుఫాన్ భయాల నేపథ్యంలో ఏపీలోని కోస్తా, ఉత్తరాంధ్ర ప్రాంతాల్లోని పాఠశాలలకు అధికారులు సెలవులు ప్రకటించారు.  
​అతి భారీ వర్షాల హెచ్చరికల వల్ల విజయనగరం, విశాఖపట్నం, అనకాపల్లి,  అల్లూరి సీతారామరాజు, కాకినాడ, అంబేడ్కర్ కోనసీమ, ఉభయ గోదావరి, పోలవరం, కృష్ణా, ఎన్టీఆర్  జిల్లాల్లో మంగళ, బుధవారం విద్యాసంస్థలు మూసివేస్తున్నట్లు తెలిపారు. జిల్లాల వారీగా కలెక్టర్లు విద్యాసంస్థలకు సెలవులు ప్రకటించారు. పరిస్థితిని బట్టి మిగతా జిల్లాల్లోనూ సెలవులు ఇచ్చే అవకాశం ఉంది. ప్రజలంతా అత్యంత అప్రమత్తంగా ఉండాలని రాష్ట్ర విపత్తుల నిర్వహణ సంస్థ సూచించింది.