ఎంపీటీసీ ఎన్నికల సిబ్బందికి శిక్షణ

నేటి దినపత్రిక సూర్య బ్యూరో రాజమహేంద్రవరంరాబోయే ఎంపీటీసీ ఎన్నికల నిర్వహణలో భాగంగా మండపేట మండల ఎన్నికల సిబ్బందికి ప్రత్యేక అవగాహన, శిక్షణ కార్యక్రమాన్ని స్థానిక డాక్టర్ పాలడుగు సత్యవతి చంద్రమౌళి జిల్లా పరిషత్ బాలికల ఉన్నత పాఠశాలలో అసిస్టెంట్ రిటర్నింగ్ అధికారి, ఎంపీడీఓ కె. సత్యనారాయణమూర్తి ఆధ్వర్యంలో నిర్వహించారు.ఈ శిక్షణ కార్యక్రమంలో ఎంపీటీసీ ఎన్నికలకు ప్రిసైడింగ్ అధికారులు  అసిస్టెంట్ ప్రిసైడింగ్ అధికారులు గా ఎంపికైన సిబ్బంది పాల్గొన్నారు.ఈ సందర్భంగా అధికారులు మాట్లాడుతూ ఎన్నికల కమిషన్ నిబంధనలను కచ్చితంగా పాటిస్తూ పోలింగ్ ప్రక్రియను నిష్పాక్షికంగా, ప్రశాంత వాతావరణంలో నిర్వహించాలని సూచించారు. పోలింగ్ రోజున అనుసరించాల్సిన విధివిధానాలు, ఓటింగ్ యంత్రాలు లేదా బ్యాలెట్ బాక్సుల నిర్వహణ, పోలింగ్ సామగ్రి సేకరణ, పంపిణీ కేంద్రాల వద్ద తీసుకోవాల్సిన జాగ్రత్తలు తదితర అంశాలపై సమగ్ర అవగాహన కల్పించారు.ఎన్నికల విధుల్లో ఎలాంటి పొరపాట్లకు తావులేకుండా ప్రతి ఒక్కరూ అప్రమత్తంగా వ్యవహరించాలని, తమకు కేటాయించిన బాధ్యతలను సమర్థవంతంగా నిర్వర్తించాలని శిక్షకులు సూచించారు. ఎన్నికల నిర్వహణలో పారదర్శకతకు, నిబంధనల అమలుకు అత్యంత ప్రాధాన్యం ఇవ్వాలని స్పష్టం చేశారు.

ఈ కార్యక్రమంలో సంబంధిత అధికారులు, శిక్షకులు, ఎన్నికల విధులకు నియమితులైన సిబ్బంది పెద్ద సంఖ్యలో పాల్గొన్నారు