చైల్డ్ రెస్పాన్స్ వెహికల్ డ్రైవర్ పోస్టుకు దరఖాస్తుల ఆహ్వానం

నెలకు రూ.19,500 వేతనం.. ఈ వారంలోపు దరఖాస్తు చేసుకోవాలి

(రంగారెడ్డి - మేజర్ న్యూస్) : మహిళా అభివృద్ధి మరియు శిశు సంక్షేమ శాఖ, జిల్లా బాలల పరిరక్షణ విభాగం (DCPU) పరిధిలో చైల్డ్ రెస్పాన్స్ వెహికల్ (CRV-03) డ్రైవర్ పోస్టు భర్తీకి అర్హత, ఆసక్తి కలిగిన అభ్యర్థుల నుంచి దరఖాస్తులు ఆహ్వానిస్తున్నట్లు జిల్లా మహిళా అభివృద్ధి, శిశు సంక్షేమ శాఖ అధికారి శాంత శ్రీ తెలిపారు.

రంగారెడ్డి జిల్లా పరిధిలోని అన్ని ప్రాంతాలకు వెళ్లి విధులు నిర్వహించేందుకు సిద్ధంగా ఉండటంతో పాటు, చెల్లుబాటు అయ్యే డ్రైవింగ్ లైసెన్స్ కలిగిన అభ్యర్థులు ఈ పోస్టుకు దరఖాస్తు చేసుకోవచ్చని పేర్కొన్నారు. ఎంపికైన అభ్యర్థులు బాలలను అత్యవసర పరిస్థితుల్లో రక్షించి, సంబంధిత బాలల సంరక్షణ సంస్థలు లేదా హాస్టళ్లకు సురక్షితంగా తరలించాల్సి ఉంటుందని తెలిపారు. షిఫ్ట్ విధానంలో విధులు నిర్వహించేందుకు సిద్ధంగా ఉండాలని సూచించారు.

ఈ పోస్టుకు ఎంపికైన అభ్యర్థికి నెలకు రూ.19,500 వేతనం చెల్లించనున్నట్లు వెల్లడించారు. బాలల పరిరక్షణకు సంబంధించిన అత్యవసర సేవల్లో బాధ్యతాయుతంగా విధులు నిర్వహించగల అభ్యర్థులకు ప్రాధాన్యత ఉంటుందని పేర్కొన్నారు.

దరఖాస్తు చేసుకోవాల్సిన చిరునామా: ఆసక్తి, అర్హత కలిగిన అభ్యర్థులు తమ దరఖాస్తులను ఈ వారంలోపు జిల్లా బాలల పరిరక్షణ విభాగం (DCPU), బాలరక్ష భవన్, వెంగల్ రావ్ నగర్, మధురానగర్ మెట్రో స్టేషన్, పిల్లర్ నంబర్ 1467, హైదరాబాద్ చిరునామాలో భౌతికంగా సమర్పించాలి. దరఖాస్తుతో పాటు డ్రైవింగ్ లైసెన్స్, ఇతర సంబంధిత ధ్రువపత్రాల ప్రతులను జతచేయాలని ఆమె సూచించారు.