బ్రహ్మగిరి క్షేత్రంలో వైభవంగా శ్రీ మహాలక్ష్మీ అమ్మవారి అలంకరణ

చేవెళ్ల: శరన్నవరాత్రి ఉత్సవాల్లో భాగంగా నాలుగో రోజు చేవెళ్లలోని బ్రహ్మగిరి క్షేత్రంలో శ్రీ మహాలక్ష్మీ అమ్మవారు భక్తులకు విశేష అలంకరణలో దర్శనమిచ్చారు. ఈ సందర్భంగా ఆలయంలో ప్రత్యేక పూజా కార్యక్రమాలను భక్తిశ్రద్ధలతో నిర్వహించారు. ఉదయం అమ్మవారికి పంచామృత అభిషేకాలు నిర్వహించి, అనంతరం పసుపు అలంకరణతో అమ్మవారిని విశేషంగా అలంకరించారు. శ్రీచక్ర కుంకుమార్చన, శ్రీ మహాలక్ష్మీ అమ్మవారి అష్టోత్తర శతనామావళి పఠనం తదితర పూజా కార్యక్రమాలను నిర్వహించారు. అనంతరం మహా మంగళహారతితో పూజా కార్యక్రమాలను ముగించారు. శరన్నవరాత్రుల సందర్భంగా శ్రీ మహాలక్ష్మీ అమ్మవారి దర్శనం, ప్రత్యేక పూజల్లో పాల్గొనేందుకు భక్తులు ఆసక్తి చూపించారు. అమ్మవారి కృపతో ప్రజలందరికీ సుఖసంతోషాలు, అష్టైశ్వర్యాలు కలగాలని భక్తులు ప్రార్థించారు.