అప్పులు తీర్చినా.. మళ్లీ బకాయి నోటీసులా? బెజ్జుర్ పీఏసీఎస్‌లో ఏం జరుగుతోంది?
• సుమారు 900 మంది రైతులకు నోటీసులు.. విచారణకు డిమాండ్..…
సూర్య బెజ్జుర్ :
కొమరం భీమ్ ఆసిఫాబాద్ జిల్లా బెజ్జుర్ మండలంలోని ప్రాథమిక వ్యవసాయ సహకార సంఘంలో సుమారు 900 మంది రైతులకు రుణ బకాయిలు ఉన్నాయంటూ నోటీసులు జారీ కావడం చర్చనీయాంశంగా మారింది. గతంలో తీసుకున్న రుణాలను పూర్తిగా చెల్లించినప్పటికీ మళ్లీ బకాయిలు చెల్లించాలని నోటీసులు రావడంతో రైతులు ఆందోళన చెందుతున్నారు. అసలు అప్పు లేని రైతుల పేర్లపై కూడా బకాయిలు చూపిస్తున్నారనే ఆరోపణలు వినిపిస్తున్నాయి. ఈ వ్యవహారంపై ఆర్టీఐ ప్రొటెక్షన్ యాక్ట్ 2005 కమిటీ జిల్లా ప్రధాన కార్యదర్శి కుమ్మరి లింగయ్య స్పందిస్తూ, ప్రజావాణిలో ఫిర్యాదు చేసి సమగ్ర విచారణ కోరనున్నట్లు తెలిపారు. పీఏసీఎస్ ప్రారంభమైనప్పటి నుంచి ఇప్పటివరకు రైతుల వ్యక్తిగత రుణ ఖాతాలు, లోన్ లెడ్జర్లు, చెల్లింపుల రికార్డులను ఉన్నతాధికారులు క్షుణ్ణంగా పరిశీలించి వాస్తవాలు వెలుగులోకి తీసుకురావాలని, రైతులకు న్యాయం చేయాలని కోరారు.
