స్పీకర్ గడ్డం ప్రసాద్ కుమార్ చొరవతో బాధితురాలికి రూ.లక్ష LOC మంజూరు

వికారాబాద్ జిల్లా ప్రతినిధి, మేజర్ న్యూస్:అనారోగ్యంతో బాధపడుతున్న పేద కుటుంబానికి చెందిన మహిళకు వైద్య చికిత్స అందించేందుకు తెలంగాణ శాసనసభాపతి, వికారాబాద్ ఎమ్మెల్యే గడ్డం ప్రసాద్ కుమార్ చొరవ తీసుకున్నారు. వికారాబాద్ పట్టణానికి చెందిన పెద్ది మల్లయ్య భార్య పెద్ది రసమ్మ అనారోగ్యంతో బాధపడుతున్న విషయాన్ని స్పీకర్ దృష్టికి తీసుకెళ్లగా, వెంటనే స్పందించిన ఆయన ముఖ్యమంత్రి సహాయ నిధి (CMRF) కింద రూ.లక్ష విలువైన LOC మంజూరు చేయించారు.హైదరాబాద్‌లోని పంజాగుట్ట నిమ్స్ ఆసుపత్రిలో చికిత్స పొందేందుకు ఈ ఆర్థిక సహాయం మంజూరైంది. LOC ద్వారా బాధితురాలు ఆసుపత్రిలో చేరి తక్షణ వైద్య చికిత్స పొందేందుకు అవకాశం కల్పించారు. అనారోగ్యంతో బాధపడుతున్న పేదలకు ప్రజా ప్రభుత్వం అండగా ఉంటుందని, ముఖ్యమంత్రి సహాయ నిధి ద్వారా అర్హులైన ప్రతి ఒక్కరికీ వైద్య సహాయం అందేలా కృషి చేస్తామని ఈ సందర్భంగా స్పీకర్ గడ్డం ప్రసాద్ కుమార్ తెలిపారు.తమ కుటుంబ సభ్యురాలి వైద్య చికిత్సకు ఆర్థిక సహాయం అందేలా చొరవ తీసుకొని రూ.లక్ష LOC మంజూరు చేయించిన స్పీకర్ గడ్డం ప్రసాద్ కుమార్‌కు బాధితురాలు పెద్ది రసమ్మ కుటుంబ సభ్యులు హృదయపూర్వక కృతజ్ఞతలు తెలిపారు.