సంప్రదాయాలు, సంస్కృతిని భావితరాలకు అందించాలి. - ఎమ్మెల్యే కొక్కిరాల ప్రేమ్‌సాగర్‌రావు
సూర్య, నస్పూర్ : గ్రామీణ ప్రాంతాల్లో నిర్వహించే ఆధ్యాత్మిక కార్యక్రమాలు ప్రజల మధ్య ఐక్యతను, భక్తిభావాన్ని పెంపొందించడంతో పాటు పూర్వీకుల సంప్రదాయాలు, సంస్కృతిని భావితరాలకు అందించడంలో కీలక పాత్ర పోషిస్తాయని మంచిర్యాల ఎమ్మెల్యే కొక్కిరాల ప్రేమ్‌సాగర్‌రావు అన్నారు. భూలక్ష్మి, మహాలక్ష్మి, పోచమ్మ తల్లుల ఆశీస్సులతో సీతారాంపల్లి గ్రామ ప్రజలంతా సుఖసంతోషాలతో, ఆయురారోగ్యాలతో, అష్టైశ్వర్యాలతో వర్ధిల్లాలని ఆకాంక్షించారు.
మంచిర్యాల మున్సిపల్‌ కార్పొరేషన్‌ పరిధిలోని 9వ డివిజన్‌ సీతారాంపల్లిలో ఆదివారం నిర్వహించిన భూలక్ష్మి, మహాలక్ష్మి, పోచమ్మ తల్లుల కొలుపు ఉత్సవాలు భక్తిశ్రద్ధలతో ఘనంగా జరిగాయి. ఈ సందర్భంగా ఎమ్మెల్యే కొక్కిరాల ప్రేమ్‌సాగర్‌రావు, మాజీ డీసీసీ అధ్యక్షురాలు కొక్కిరాల సురేఖ దంపతులు, మేయర్ ధర్ని మధుకర్ పాల్గొని అమ్మవార్లకు ప్రత్యేక పూజలు నిర్వహించారు. గ్రామంలో ఇలాంటి ఉత్సవాలు నిర్వహించడం వల్ల ప్రజలందరూ ఒకచోట చేరి ఆధ్యాత్మిక భావనతో పాటు పరస్పర అనుబంధాన్ని పెంపొందించుకునే అవకాశం ఉంటుందని ఎమ్మెల్యే పేర్కొన్నారు. అనంతరం ఎమ్మెల్యే దంపతులను గ్రామస్తులు శాలువాలతో ఘనంగా సత్కరించారు. ఈ కార్యక్రమంలో, స్థానిక కార్పొరేటర్‌ సురిమిల్ల సౌమ్య, గ్రామ పెద్దలు, నాయకులు, ప్రజలు పాల్గొన్నారు.
