telanagana
గుర్తింపునకు నోచుకోని పెద్దూర్ కాలనీ - మూడేళ్లుగా ఓటు హక్కుకు దూరం
సూర్య రాజన్న సిరిసిల్ల ;సొంత ఇంటి కల నెరవేరింది,ఆ ఇంటికి గుర్తింపే లేకుండా పోయింది.ఇది సిరిసిల్లలోని పెద్దూర్ డబుల్ బెడ్‌రూమ్ వాసుల పరిస్థితి.39వ వార్డు పరిధిలోని పెద్దూర్ డబుల్ బెడ్‌రూమ్ కాలనీలో గత మూడు సంవత్సరాలుగా దాదాపుగా 100 కుటుంబాలు నివాసం ఉంటున్నాయి.గత ప్రభుత్వం ఇళ్లు కేటాయించి చేతులు దులుపుకుందే తప్ప,కనీసం ఇంటి నంబర్లు కూడా ఇవ్వలేదని లబ్ధిదారులు వాపోతున్నారు.ఓటు హక్కు లేదు..ఇంటి నంబర్ లేకపోవడంతో ఓటర్ జాబితాలో తమ పేర్లు నమోదు కావడం లేదని,దీంతో రాజ్యాంగం కల్పించిన ఓటు హక్కుకు దూరమయ్యామని వారు ఆవేదన వ్యక్తం చేస్తున్నారు.ఆధార్,రేషన్ కార్డుల్లో అడ్రస్ మార్పు,పిల్లల చదువులు,బ్యాంకు లావాదేవీలకు తీవ్ర ఇబ్బందులు పడుతున్నామన్నారు.
కలెక్టర్ ఆదేశించినా కదలిక లేదు:
ఇదే విషయమై గతంలో జిల్లా కలెక్టర్‌కు వినతిపత్రం ఇవ్వగా,మున్సిపల్ కమిషనర్‌కు ఇంటి నంబర్లు కేటాయించి ఓటు హక్కు కల్పించాలని ఆదేశాలు ఇచ్చారని,అయినా అధికారులు పట్టించుకోలేదని కాలనీ వాసులు చెబుతున్నారు.ఈ నేపథ్యంలో తాజాగా సిరిసిల్ల మున్సిపల్ కమిషనర్‌ను కలిసి వినతిపత్రం అందజేశారు.తమకు ఇంటి నంబర్లు కేటాయించి,ఓటు హక్కు కల్పించి గుర్తింపు ఇవ్వాలని కోరారు.ఈ కార్యక్రమం లో కాలనీవాసులు రాహుల్,అశోక్,మోహన్, సంతోష్,మహేష్ కుమార్,నవీన్ తదితరులు పాల్గొన్నారు.
