తెగిపోయిన చేతికి మళ్లీ ప్రాణం…

కేర్ హాస్పిటల్స్‌లో 10 గంటల క్లిష్ట శస్త్రచికిత్స

డ్రిల్ మెషిన్ ప్రమాదంలో పూర్తిగా తెగిపోయిన 19 ఏళ్ల యువకుడి కుడి ముంజేయి పునఃఅమరిక

గంటలోపే ఆస్పత్రికి చేరడంతో ఫలించిన వైద్యుల ప్రయత్నం

చేతికి సాధారణ రక్తప్రసరణ.. వేళ్లలో కదలిక, స్పర్శ కనిపిస్తున్నట్లు వైద్యుల వెల్లడి

హైదరాబాద్, అక్టోబర్ 5*: డ్రిల్ మెషిన్‌తో పనిచేస్తుండగా జరిగిన ప్రమాదంలో పూర్తిగా తెగిపోయిన 19 ఏళ్ల యువకుడి కుడి ముంజేయిని *కేర్ హాస్పిటల్స్, హైటెక్ సిటీ వైద్యులు* విజయవంతంగా తిరిగి అమర్చారు. సుమారు 10 గంటలపాటు సాగిన క్లిష్ట శస్త్రచికిత్స ద్వారా యువకుడి చేతిని కాపాడారు. ప్రస్తుతం పునఃఅమర్చిన చేతికి రక్తప్రసరణ సాధారణంగా ఉండటంతో పాటు వేళ్లలో కదలిక, స్పర్శ కూడా కనిపిస్తున్నట్లు వైద్యులు తెలిపారు.

పారిశ్రామిక రంగంలో పనిచేస్తున్న ఈ యువకుడు డ్రిల్ మెషిన్‌ను ఆపరేట్ చేస్తుండగా తీవ్ర ప్రమాదానికి గురయ్యాడు. మెషిన్‌లో చిక్కుకోవడంతో కుడి ముంజేయి తీవ్రంగా నలిగిపోయి పూర్తిగా తెగిపోయింది. ప్రమాదం జరిగిన గంటలోపే అతడిని కేర్ హాస్పిటల్స్, హైటెక్ సిటీ అత్యవసర విభాగానికి తరలించారు.

యువకుడి వయసు, గాయం తీవ్రత, ప్రమాదం జరిగిన వెంటనే ఆస్పత్రికి తీసుకురావడం వంటి అంశాలను పరిశీలించిన వైద్యులు తెగిపోయిన చేతిని తిరిగి అమర్చేందుకు ప్రయత్నించాలని నిర్ణయించారు. అతడి భవిష్యత్తు, స్వతంత్ర జీవనం, ఉపాధిని దృష్టిలో పెట్టుకుని వెంటనే శస్త్రచికిత్స ప్రారంభించారు.

ఆర్థోపెడిక్స్, ప్లాస్టిక్ అండ్ రీకన్‌స్ట్రక్టివ్ సర్జరీ, జనరల్ సర్జరీ, అనస్థీషియా విభాగాలకు చెందిన వైద్య నిపుణులు సమన్వయంతో ఈ క్లిష్ట శస్త్రచికిత్స నిర్వహించారు. ముందుగా దెబ్బతిన్న కణజాలాన్ని శుభ్రపరిచి, ముంజేయిలోని రెండు ఎముకలను ప్లేట్ల సహాయంతో స్థిరీకరించారు. అనంతరం చేతికి రక్తప్రసరణను పునరుద్ధరించి, దెబ్బతిన్న మృదు కణజాలాన్ని పునర్నిర్మించారు.

పూర్తిగా తెగిపోయిన అవయవాన్ని తిరిగి అమర్చడం అత్యంత క్లిష్టమైన పునర్నిర్మాణ శస్త్రచికిత్సల్లో ఒకటని వైద్యులు తెలిపారు. ఎముకలను స్థిరీకరించడంతో పాటు రక్తప్రసరణను పునరుద్ధరించడం, దెబ్బతిన్న కణజాలాన్ని పునర్నిర్మించడం ఇందులో కీలకమన్నారు. ప్రమాదం తీవ్రత, రోగి ఎంత త్వరగా ప్రత్యేక ట్రామా సెంటర్‌కు చేరుకున్నారన్నది కూడా చికిత్స ఫలితాన్ని ప్రభావితం చేస్తుందని వివరించారు.

కేర్ హాస్పిటల్స్, హైటెక్ సిటీ సీనియర్ కన్సల్టెంట్ – ప్లాస్టిక్ సర్జరీ డాక్టర్ దివ్య సాయి నర్సింగం మాట్లాడుతూ,
“పూర్తిగా తెగిపోయిన అవయవాన్ని తిరిగి అమర్చేటప్పుడు ముందుగా దానికి రక్తప్రసరణను పునరుద్ధరించి, అవయవాన్ని సజీవంగా ఉంచడం ప్రధాన సవాలు. ఆ తర్వాత దెబ్బతిన్న భాగాలు, మృదు కణజాలాన్ని జాగ్రత్తగా పునర్నిర్మించాలి. ప్రస్తుతం పునఃఅమర్చిన ముంజేయికి రక్తప్రసరణ సాధారణంగా ఉంది. వేళ్లలో కదలికతో పాటు స్పర్శ కూడా కనిపించడం మంచి పరిణామం. ఇకపై పునరావాస చికిత్స ద్వారా చేతి పనితీరును సాధ్యమైనంత మేర తిరిగి తీసుకురావడంపై దృష్టి పెడతాం” అని తెలిపారు.

శస్త్రచికిత్స అనంతరం యువకుడిని సర్జికల్ ఐసీయూలో ఉంచి నిరంతరం పర్యవేక్షించారు. గాయం మానేందుకు తదుపరి చికిత్సలో భాగంగా స్కిన్ గ్రాఫ్టింగ్ కూడా నిర్వహించారు. చికిత్సకు యువకుడు సానుకూలంగా స్పందించడంతో ఆరోగ్య పరిస్థితి స్థిరంగా ఉన్న అనంతరం ఆస్పత్రి నుంచి డిశ్చార్జ్ చేశారు.

సీనియర్ కన్సల్టెంట్ – జనరల్ సర్జరీ డాక్టర్ కె. హరికృష్ణ రెడ్డి మాట్లాడుతూ,
“యంత్రాలతో పనిచేసే సమయంలో జరిగే పారిశ్రామిక ప్రమాదాలు క్షణాల్లోనే తీవ్ర నష్టాన్ని కలిగించవచ్చు. ఈ కేసులో ప్రమాదం జరిగిన వెంటనే రోగిని ప్రత్యేక అత్యవసర వైద్య సేవలు అందుబాటులో ఉన్న ఆస్పత్రికి తీసుకురావడం కీలకంగా మారింది. అవసరమైన అన్ని విభాగాల వైద్యులు వెంటనే చికిత్స ప్రారంభించగలగడం మంచి ఫలితానికి దోహదపడింది” అన్నారు.

క్లినికల్ డైరెక్టర్, సీనియర్ కన్సల్టెంట్ – ఆర్థోపెడిక్స్ డాక్టర్ గొట్టెముక్కల అశోక్ రాజు మాట్లాడుతూ,
“ముంజేయి పూర్తిగా తెగిపోవడంతో పాటు తీవ్రంగా నలిగిపోయిన పరిస్థితిలో యువకుడు మా వద్దకు వచ్చాడు. ప్రమాదం జరిగిన గంటలోపే ఆస్పత్రికి చేరుకోవడం చాలా కీలకం. ఇటువంటి గాయాల్లో ప్రతి నిమిషం విలువైనదే. ముందుగా చేతిని స్థిరీకరించి, వివిధ విభాగాల వైద్యులు సమన్వయంతో పనిచేసి అతడి చేతిని కాపాడేందుకు అన్ని ప్రయత్నాలు చేశాం” అని వివరించారు.

కేర్ హాస్పిటల్స్, హైటెక్ సిటీ చీఫ్ ఆపరేటింగ్ ఆఫీసర్ డాక్టర్ ప్రమోద్ గుప్తా మాట్లాడుతూ,
“19 ఏళ్ల యువకుడికి ఒక చేతిని కాపాడటం అంటే కేవలం గాయానికి చికిత్స చేయడం మాత్రమే కాదు. అతడి భవిష్యత్తు, స్వతంత్ర జీవనం, ఉపాధిపైనా దీని ప్రభావం ఉంటుంది. ఎమర్జెన్సీ, సర్జరీ, క్రిటికల్ కేర్, రిహాబిలిటేషన్ బృందాలు సమన్వయంతో పనిచేయడం వల్ల ఈ ఫలితం సాధ్యమైంది. యువకుడు కోలుకుంటున్న తీరు సంతోషాన్నిస్తోంది” అన్నారు.

యువకుడికి ఇకపై క్రమం తప్పకుండా వైద్య పరీక్షలతో పాటు పునరావాస చికిత్స కొనసాగుతుందని వైద్యులు తెలిపారు. చేతికి సాధారణ రక్తప్రసరణ ఉండటం, వేళ్లలో ప్రారంభ కదలిక, స్పర్శ కనిపించడం ఆశాజనక సంకేతాలన్నారు. అయితే చేతి పనితీరు ఎంతవరకు తిరిగి వస్తుందనేది గాయం మానడం, నరాల పునరుద్ధరణ, నిరంతర ఫిజియోథెరపీ, పునరావాస చికిత్సపై ఆధారపడి ఉంటుందని పేర్కొన్నారు.

*తెగిపోయిన అవయవాన్ని ఎలా తీసుకురావాలి?*

ప్రమాదంలో చేయి లేదా ఇతర అవయవం పూర్తిగా తెగిపోతే దానిని కూడా రోగితో పాటు వీలైనంత త్వరగా ఆస్పత్రికి తీసుకురావాలని వైద్యులు సూచించారు. తెగిపోయిన భాగాన్ని శుభ్రమైన తడి గాజ్‌తో చుట్టి, శుభ్రమైన సీల్డ్ ప్లాస్టిక్ బ్యాగ్‌లో ఉంచి చల్లగా ఉండేలా చూడాలి. నేరుగా మంచుపై మాత్రం పెట్టకూడదు. రోగితో పాటు తెగిపోయిన భాగాన్ని కూడా వీలైనంత త్వరగా ప్రత్యేక ట్రామా, పునర్నిర్మాణ శస్త్రచికిత్స సదుపాయాలు ఉన్న ఆస్పత్రికి తరలించాలి.

పారిశ్రామిక ప్రమాదాల్లో వేగవంతమైన అత్యవసర వైద్యం, ఆర్థోపెడిక్, ప్లాస్టిక్ అండ్ రీకన్‌స్ట్రక్టివ్ సర్జరీ నిపుణుల సమన్వయం, అధునాతన శస్త్రచికిత్స పద్ధతులు కలిసి పనిచేస్తే తీవ్రంగా దెబ్బతిన్న లేదా పూర్తిగా తెగిపోయిన అవయవాలను సైతం కాపాడే అవకాశం ఉంటుందని ఈ కేసు చాటిచెప్పింది.