ఆర్టీసీ బస్సు–టాటా మ్యాజిక్ ఢీ

విద్యార్థులు ప్రయాణిస్తున్న వాహనాన్ని బలంగా ఢీకొన్న బస్సు.. 

డ్రైవర్, ఇద్దరు విద్యార్థినులకు తీవ్ర గాయాలు

సూర్య, కోరుట్ల: కోరుట్ల పట్టణ శివారులో ఆర్టీసీ బస్సు, విద్యార్థులతో వెళ్తున్న టాటా మ్యాజిక్ వాహనం ఢీకొన్న రోడ్డు ప్రమాదంలో ఆటో డ్రైవర్‌తో పాటు పలువురు విద్యార్థులు గాయపడ్డారు. స్థానికుల వివరాల ప్రకారం.. కోరుట్ల పట్టణంలోని శ్రీచైతన్య పాఠశాలలో పదో తరగతి ప్రత్యేక తరగతులు ముగించుకున్న విద్యార్థులు టాటా మ్యాజిక్ వాహనంలో కథలాపూర్ మండలం వైపు బయలుదేరారు. పట్టణ శివారు ప్రాంతానికి చేరుకున్న సమయంలో మరో వాహనాన్ని తప్పించుకునే క్రమంలో ఆర్టీసీ బస్సు అదుపుతప్పి విద్యార్థులు ప్రయాణిస్తున్న టాటా మ్యాజిక్‌ను బలంగా ఢీకొట్టినట్లు సమాచారం.ఈ ప్రమాదంలో టాటా మ్యాజిక్ డ్రైవర్ కమలాకర్‌తో పాటు విద్యార్థినులు హర్షిత, మోక్షిత తీవ్రంగా గాయపడగా, మరో ఏడుగురు విద్యార్థులకు గాయాలయ్యాయి. 

ప్రమాదం జరిగిన వెంటనే స్థానికులు స్పందించి క్షతగాత్రులను వాహనాల ద్వారా కోరుట్ల ప్రభుత్వ ఆసుపత్రికి తరలించారు. తీవ్రంగా గాయపడిన వారికి వైద్యులు అత్యవసర చికిత్స అందిస్తున్నారు.ప్రమాద సమాచారం అందుకున్న పోలీసులు సంఘటనా స్థలానికి చేరుకుని పరిస్థితిని పరిశీలించారు. ప్రమాదానికి గల కారణాలపై వివరాలు సేకరిస్తూ కేసు నమోదు చేసి దర్యాప్తు చేపట్టారు. విద్యార్థులు ప్రయాణిస్తున్న వాహనాన్ని ఆర్టీసీ బస్సు ఢీకొనడంతో వారి తల్లిదండ్రుల్లో ఆందోళన నెలకొంది.