వైకాపాను ఆదరించాలి: మాజీ ఎమ్మెల్యే శ్రీదేవమ్మ దేవనబండ, ఎంపీటీసీ-7 స్థానాల్లో వైకాపా ప్రచారం
పత్తికొండ (మేజర్ న్యూస్): గత వైకాపా ప్రభుత్వంలో అర్హులందరికీ సంక్షేమ ఫలాలు అందాయని మాజీ ఎమ్మెల్యే కంగాటి శ్రీదేవమ్మ తెలిపారు. పత్తికొండ మండలం దేవనబండ గ్రామంలో శనివారం సాయంత్రం వైఎస్సార్‌సీపీ తరఫున ఎన్నికల ప్రచారం నిర్వహించారు. ఈ సందర్భంగా ఆమె మాట్లాడుతూ ఎన్నికల్లో ఇచ్చిన హామీలను నెరవేర్చడంలో ప్రస్తుత కూటమి ప్రభుత్వం పూర్తిగా విఫలమైందని విమర్శించారు. వైకాపా పాలనలోనే పేదల సంక్షేమానికి ప్రాధాన్యం దక్కిందన్నారు.అనంతరం పత్తికొండ పట్టణంలోని ఎంపీటీసీ-7 పరిధిలో మాజీ ఎంపీపీ నాగరత్నమ్మ, సీపీఐ నాయకులతో కలిసి ఇంటింటి ప్రచారం చేపట్టారు. రాబోయే స్థానిక సంస్థల ఎన్నికల్లో జడ్పీటీసీ అభ్యర్థికి ఫ్యాన్ గుర్తుపై, ఎంపీటీసీ అభ్యర్థికి కంకి-కొడవలి గుర్తుపై ఓటు వేసి అత్యధిక మెజారిటీతో గెలిపించాలని కోరారు. కార్యక్రమంలో స్థానిక వైకాపా, సీపీఐ నాయకులు, కార్యకర్తలు పాల్గొన్నారు.
