నర్సాపురంలోని తుపాను ప్రభావిత ప్రాంతాల్లో పర్యటించిన మంత్రి గొట్టిపాటి

నర్సాపురంలోని తుపాను ప్రభావిత ప్రాంతాల్లో రాష్ట్ర విద్యుత్ శాఖ మంత్రి గొట్టిపాటి రవికుమార్ పర్యటించి, క్షేత్రస్థాయిలో జరుగుతున్న సహాయక చర్యలపై ఆరా తీశారు. అనంతరం ఈపీడీసీఎల్, ఎస్పీడీసీఎల్ సీఎండీలు పృథ్వీతేజ, శివశంకర్‌లతో పాటు విద్యుత్ శాఖ ఉన్నతాధికారులతో ఆయన ప్రత్యేక సమీక్షా సమావేశం నిర్వహించారు. తుపాను వల్ల దెబ్బతిన్న ప్రాంతాల్లో విద్యుత్ పునరుద్ధరణ పనులను వేగవంతం చేయాలని, అవసరమైతే పనిచేసే బ్యాచ్‌ల సంఖ్యను పెంచాలని అధికారులను ఆదేశించారు. దూర ప్రాంతాల నుంచి వచ్చి రాత్రింబవళ్లు శ్రమిస్తున్న విద్యుత్ సిబ్బందికి ఎలాంటి ఇబ్బందులు కలగకుండా సరైన భోజనం, వసతి సదుపాయాలు కల్పించాలని సూచించారు. తుపాను కారణంగా విద్యుత్ సరఫరా నిలిచిపోయిన ప్రభావిత 5,347 గ్రామాల్లో ఇప్పటివరకు పునరుద్ధరణ పనులను విజయవంతంగా పూర్తి చేశామని మంత్రి వెల్లడించారు. రేపు సాయంత్రానికి తుపాను ప్రభావిత ప్రాంతాలన్నింటిలో విద్యుత్ సరఫరాను పూర్తిస్థాయిలో పునరుద్ధరిస్తామని స్పష్టం చేశారు. ముందుగా గృహ వినియోగదారులకు విద్యుత్ పునరుద్ధరణ పూర్తి చేసి, ఆ తర్వాత వరుసగా వ్యవసాయం, ఆక్వా రంగాలకు విద్యుత్ సరఫరాను పునరుద్ధరిస్తామని తెలిపారు. బాధితులకు ప్రభుత్వం అన్ని విధాలా అండగా నిలిచి ఆదుకుంటుందని మంత్రి గొట్టిపాటి రవికుమార్ హామీ ఇచ్చారు.