జడ్పిటిసి ఎంపీటీసీ ఓట్ల లెక్కింపు కేంద్రాలను సిద్ధం చేయాలి

 ఏలూరు, మేజర్ న్యూస్:  జిల్లాలో జెడ్పిటిసి, ఎంపిటిసి   ఎన్నికల కౌంటింగ్ కేంద్రాలను నవంబర్, 1వ తేదీ నాటికి సిద్ధం చేయాలనీ జిల్లా కలెక్టర్ కె. వెట్రిసెల్వి అధికారులను ఆదేశించారు.  స్థానిక సంస్థల ఎన్నికల పోలింగ్, కౌంటింగ్ ప్రక్రియల నిర్వహణపై శనివారం సాయంత్రం అధికారులతో కలెక్టర్ టెలి కాన్ఫరెన్స్ ద్వారా సమీక్షించారు. ఈ సందర్భంగా కలెక్టర్ వెట్రిసెల్వి మాట్లాడుతూ జెడ్పిటిసి, ఎంపిటిసి   ఎన్నికల కౌంటింగ్ కేంద్రాలను నవంబర్,1వ తేదీ నాటికి పూర్తిస్థాయిలో  ఏర్పాటుచేయాలన్నారు. పోలింగ్ సిబ్బందికి ఇప్పటికే శిక్షణా కార్యక్రమాలు నిర్వహించడం జరిగిందని, కౌంటింగ్ సిబ్బందికి నవంబర్,2వతేదీన మొదటి శిక్షణ, 6వ తేదీన రెండవ విడత శిక్షణా కార్యక్రమాలు నిర్వహించాలన్నారు.  మునిసిపల్, జెడ్పిటిసి, ఎంపిటిసి ఎన్నికల కౌంటింగ్ అనంతరం బ్యాలెట్ బాక్సులను స్ట్రాంగ్ రూమ్ లో భద్రత పరచాలని, వర్షాలు కురిసే అవకాశం ఉందన్న వాతావరణ శాఖ హెచ్చరికల నేపథ్యంలో బ్యాలెట్ బాక్సులు తడిచిపోకుండా పటిష్టమైన చర్యలు తీసుకోవాలన్నారు.  కౌంటింగ్ కేంద్రాలలో కౌంటింగ్ సిబ్బంది, కౌంటింగ్ ఏజెంట్లు ప్రవేశించడానికి వేరు, వేరు మార్గాలు ఏర్పాటుచేయాలన్నారు. కౌంటింగ్ కేంద్రంలో  కౌంటింగ్ సమయంలో ఎన్నికలలో పాల్గొనే అభ్యర్థులు, పోలింగ్ ఏజెంట్లతో ఎవరితోనూ ఇంటర్వ్యూ లు ఇవ్వకుండా చూడాలన్నారు.

జిల్లా జాయింట్ కలెక్టర్ డా.ఎం.జె. అభిషేక్ గౌడ, అసిస్టెంట్ కలెక్టర్ సిహెచ్. శ్రావణ్ కుమార్ రెడ్డి, నూజివీడు సబ్ కలెక్టర్ బి.వినూత్న, ఆర్డీఓ లు లక్ష్మీప్రసన్న, రమణ, రిటర్నింగ్ అధికారులు, అసిస్టెంట్ రిటర్నింగ్ అధికారులు, ప్రభృతులు పాల్గొన్నారు.