జాహ్నవి గెలుపే లక్ష్యంగా పువ్వాడి ఎన్నికల ప్రచార పర్వం

- గ్రామగ్రామాన నాయకులు, కార్యకర్తలతో సమావేశాలు

- ఇంటింటికీ వెళ్లి ఓటర్లను కలుస్తూ మద్దతు అభ్యర్థన

- అఖండ మెజార్టీ సాధనకు విస్తృత కార్యాచరణ

పామూరు, మేజర్ న్యూస్ : నవంబర్ 5న జరగనున్న జడ్పీటీసీ ఎన్నికల్లో ఎన్డీఏ కూటమి బలపరిచిన తెలుగుదేశం పార్టీ అభ్యర్థి  బైరెడ్డి జాహ్నవి రెడ్డిని అఖండ మెజార్టీతో గెలిపించడమే లక్ష్యంగా ఎంపీపీ పువ్వాడి వెంకటేశ్వర్లు ఎన్నికల ప్రచారాన్ని విస్తృతం చేస్తున్నారు. అభ్యర్థి విజయమే ధ్యేయంగా గ్రామస్థాయిలో పార్టీ నాయకులు, కార్యకర్తలతో వరుస సమావేశాలు నిర్వహిస్తూ ఎన్నికల ప్రచారానికి పక్కా ప్రణాళిక రూపొందిస్తున్నారు. ప్రతి గ్రామంలోనూ పార్టీ శ్రేణులను సమన్వయం చేస్తూ ప్రచార కార్యక్రమాలను ముందుకు తీసుకెళ్తున్నారు. స్వయంగా ప్రచారంలో పాల్గొంటూ ఇంటింటికీ వెళ్లి ఓటర్లను కలుసుకుని జాహ్నవి రెడ్డికి మద్దతు ఇవ్వాలని అభ్యర్థిస్తున్నారు. కూటమి ప్రభుత్వం చేపడుతున్న అభివృద్ధి, సంక్షేమ కార్యక్రమాలను ప్రజలకు వివరిస్తూ ఎన్నికల్లో కూటమి అభ్యర్థి విజయానికి సహకరించాలని కోరుతున్నారు. గ్రామాల్లో పార్టీకి ఉన్న ప్రజా మద్దతును ఓట్ల రూపంలో మలుచుకునేలా నాయకులు, కార్యకర్తలు సమష్టిగా పనిచేయాలని సూచిస్తున్నారు. ప్రతి ఓటరును వ్యక్తిగతంగా కలిసి అభ్యర్థి గెలుపు ఆవశ్యకతను వివరించాలని ప్రచారంలో ఎలాంటి అలసత్వం లేకుండా బాధ్యతగా వ్యవహరించాలని పార్టీ శ్రేణులకు దిశానిర్దేశం చేస్తున్నారు. ఎన్నికల పోలింగ్ వరకు గ్రామాల్లో ప్రచారాన్ని మరింత విస్తృతం చేసి జాహ్నవి రెడ్డికి భారీ మెజార్టీ సాధించడమే లక్ష్యంగా పువ్వాడి వెంకటేశ్వర్లు ముందుకు సాగుతున్నారు.