దెబ్బతిన్న ఉద్యాన పంటలు పొలాలను పరిశీలించిన అధికారుల బృందం

కోటబొమ్మాళి, అక్టోబరు 31, మేజర్ న్యూస్:

​అర్నాబ్ తుఫాను కారణంగా మండలంలోని నారాయణపురం గ్రామంలో ఉల్లి, టమాటా, మిరప పంటలు తీవ్రంగా దెబ్బతిన్నాయి. ఈ పంట పొలాలను పెద్దపేట హార్టికల్చర్ రీసెర్చ్ స్టేషన్ హెడ్ డా. నరసింహమూర్తి, పార్వతీపురం హార్టికల్చర్ యూనివర్సిటీ అసిస్టెంట్ ప్రొఫెసర్లు డా. బి.వి.జి. ప్రసాద్, డా. బి. హరిహరరావు, ఉద్యాన అధికారిణి కే. సునీత, విస్తరణ అధికారిణి బి. ఆమని క్షేత్రస్థాయిలో పరిశీలించి రైతన్నలకు పలు సస్యరక్షణ సూచనలు చేశారు. ఈ సందర్భంగా రైతులకు పలు జాగ్రత్తలను సూచించారు. దీనిలో భాగంగా పొలాల్లో నిలిచిన అదనపు తుఫాను నీటిని వెంటనే బయటకు పంపించి వేయాలి. నీరు నిలవడం వల్ల వేరు కుళ్ళు, కాండం కుళ్ళు తెగుళ్లు వచ్చే అవకాశం ఉంది. దీని నివారణకు లీటరు నీటికి 3 గ్రాముల కాపర్ ఆక్సిక్లోరైడ్ లేదా 1 గ్రాము కార్బండిజమ్ కలిపి మొక్కల మొదళ్లలో పోయాలి (డ్రెంచింగ్ చేయాలి).పోషకాల యాజమాన్యం పంట కోలుకోవడానికి వీలుగా లీటరు నీటికి 10 గ్రాముల 19:19:19 (ఎన్ పి కె) మరియు 1 గ్రాము ఫార్ములా-4 (సూక్ష్మపోషకాలు) కలిపి ఆకులపై పిచికారీ చేయాలి అని సూచించారు.కాగా, తుఫాను వల్ల నష్టపోయిన పంటలకు నష్టపరిహారం అందించేందుకు అధికారులు అంచనాలు రూపొందిస్తున్నామని తెలిపారు